பிரசாதத்தில் பல்லி.....

கோயிலில் பத்தகோடிகட்குத் தரப்பட்ட  அருளுணவில் பல்லி கிடந்து அதை உண்ட பலர் நோய்வாய்ப்பட்டனர்,  இச்செய்தியை கவிதையாய்த் தருகின்றன இப்பாடல்கள்,  கவனம் தேவை என்பதே யாம் சொல்வது.  எப்படி இதைச் செய்யப்போகின்றனர் என்பது தெரியவில்லை. பல்லிகள் எங்கும் இருப்பவை.


பல்லி விழுந்தால் பரமன் அருட்சோறு
சொல்ல அழவருமோர் சூழ்நலக் கேடாக்கும்;
நல்லதைச் செய்கின்ற நாட்டமே கோயிலிற்
புல்லிதாய்ப் போச்சே புகல்.

வாந்தி தலைவலி வாய்கோணி வீழ்ந்தனர்,
ஏந்தி இவர்களைப்போய் இட்டனரே நோய்மனையில்;
ஓந்தி சிறுபல்லி வீழ்ந்தாலும் ஊண்கெடுமே;
தேர்ந்தமேற் பார்வையே தேடு.

குறிப்பு:   இத்தகைய பல்லிகள்  விடம்  அல்ல என்று
அறிந்தோர் கூறுகின்றனர். உலகில் ஒரே வகைப்
பல்லி தான் விடமுள்ளதாம். அது அமெரிக்காவில்
ஓர் ஆற்றுப் பக்கம் உள்ளதாம். இதில் விழுந்த
பல்லி  சும்மா பூச்சிகளைப்  பிடித்துத் தின்னும்
பல்லியாம் . இருந்தாலும் இறந்தது,  நாறிப்போன
 எதுவும் உணவில் கலந்தால்  உணவு நஞ்சாகும்.
இந்தச் செய்தியை அப்படித்தான் எடுத்துக்கொள்ள
வேண்டியுள்ளது. 


More at:

food poisoning: 73 hospitalised after taking 'prasadam' in Tamil Nadu ...

https://timesofindia.indiatimes.com/city/chennai/73...prasadam-in.../63969460.cms

73 Hospitalised In Tamil Nadu, Claim "Lizard" Found In Temple's

https://www.ndtv.com › Tamil Nadu

Lizardfoundin`prasadam' -ANDHRA PRADESH TheHindu

www.thehindu.com/todays-paper/tp-national/.../lizard...prasadam/article2041531.ece

The spotting of a lizard in a packet of 'prasadam' caused panic among the 

pilgrims at Venkateswara Swamy temple at Dwaraka Tirumala in West 

Godavari district on Sunday. A pilgrim, Prabhu from Eluru, w.

The Hindu : Lizard in prasadam, four taken ill

www.thehindu.com/2003/12/28/stories/2003122803440400.htm

குடிப்பெயர்கள்

பல நாடுகளில் மக்களுக்குக் குலமும் கோத்திரமும் உள்ளன. இல்லையென்றால்தான் அது ஒரு வியப்புக்குரியதாகத் தெரியும்.  காரணத்தைக் கேளுங்கள். மிகமிகப் பழங்காலத்தில் மனிதர்கள் காட்டிலும் மலைகளிலும் திரிந்து துன்புற்ற அந்தத் துன்ப நாட்களில் இரவு நேரத்தில் ஒரு குடும்பத்தினர் ஒரு மரத்திலோ ஒரு குகையிலோ தங்கினர்.  மரத்திலேற முடியாத நொண்டிகளாய் இருந்தால் மரத்தடியில் கிடப்பர். கரடி புலி முதலியவை வரும், பாம்பு பூரான் முதலியவை தீண்டுமென்று அஞ்சிக்கொண்டேதான் வாழ்ந்தனர்.  ஒரு குடும்பத்துக்கு எப்போதும் ஒரு மரம் தங்குமிடமாகிவிட்டால் தெரியாதவர்களை அந்த மரத்தில் வந்து தங்க ஒப்பார். இந்த நிலையிலிருந்துதான் குலம் கோத்திரம் முதலிய வளர்ந்தன. ஒரு மரத்துக்குரியவர்கள் எதாவது ஒரு பெயரை வைத்துக்கொண்டு  உரிமை கொண்டாடிக் கொண்டிருந்தனர்.  அவர்களுக்குத் தெரிந்தவர்கள்  பக்கத்து மரங்களில் தங்கினர்.  அவர்களின் குலத்திற்கு  ஏதாவது ஒரு பெயர் இருந்திருக்கும்.  அந்தக் குலத்தின் தலைவனுக்கு முடி மிகுந்த நீட்டமாய் இருந்திருந்தால்  "  நெட்டுமுடி" என்றோ வேறு எப்படியோ ஒரு பெயர் இருக்கும். அவனைச் சேர்ந்த எல்லோருக்கும் நெட்டுமுடி என்றே குலப்பெயர் இருந்திருக்கும்.  அவர்களில் சிலருக்கு கட்டைமுடி இருந்தாலும் அதைப்பற்றி யாரும் கவலைப்படமாட்டார்கள்.

குகைகளில் வாழ்ந்தோருள்ளும் இப்படியே குலங்கள் தோன்றின.  குலம் என்றால் சேர்ந்து வாழ்தல்.  குல்> குலை;  குல் > குலம்.  குலை: வாழைகுலை; திராட்சைக் குலை. எல்லோரும் பச்சை இறைச்சி, பழங்கள் தின்று வாழ்ந்ததால் உயர்வு தாழ்வு ஒன்றும் இல்லை.  எல்லோரும் இரைதேடி உண்ணும் குருவிகளே.

அதிபர் கென்னடி என்பவர் அமரிக்காவின் புகழ்ப்பெற்ற அதிபர்.  கென்னடி என்பது அவர் குடும்பப் பெயர். இந்தப் பெயரின் பொருளைச் சிலர் தேடிக் கண்டுபிடித்தனர்.  "கென்னடி " என்றால் அசிங்கத் தலை என்று பொருள்படுவதைக் கண்டு வியந்தனர்.  ஜான் கென்னடி, ரோபர்ட் கென்னடி , எட்வர்ட் கென்னடி என்று இவர்களையெல்லாம் நினைவு கூரும்போது, அசிங்கத்தலை என்று யாரும் எண்ணுவதில்லை. நாளடைவில் சொல்லின் பொருள் மறைந்து அது வெறும் குறியீடாகவே பயன்பட்டது. மேலும் இப்போது பேசும் ஆங்கிலத்தில் கென்னடி என்ற சொல்லுக்கு அத்தகைய பொருள் ஏதும் இல்லை. அதனாலும் அது வழங்க வசதியாகிவிட்டது.  கேமரூன் என்ற பெயருக்குக் கோணல்மூக்கு என்று பொருள். இதைக் குடிப்பெயராக உள்ள இந்நாள் பெரியவருக்கு மூக்கு அழகாக உள்ளது.  ஆகவே அது வெறும் பெயர்தான்.  கோனலி என்ற குடிப்பெயர்க்கு வலியவன் என்று பொருளாம். இப்போது யாருக்கும் அந்தப் பெயரின் பொருள் தெரியாது.  ஏதேனும் ஒரு வரலாற்று நூலைப் பார்த்து என்ன பொருள் என்று யாரும் தேடுவதில்லை.

யாம் சந்தித்த ஒரு தமிழரின் குடும்பப் பெயர் " பம்பையர்" என்று பெயராம். கிணற்றிலிருந்து தண்ணீர் எடுக்கப் "பம்பு" வைத்திருந்த காரணமா?   பாம்பு வைத்திருந்ததால் பாம்பையர் என்று இருந்து பின் பம்பையர் என்று குறுகிவிட்டதா,  ஐயப்பன் கோவில் அருகில் உள்ள பம்பை நதிப் பக்கத்திலிருந்தவர்களா....... என்னவென்று அவர்களுக்கே புரியவில்லை.
ஒன்றும் புரியாத பெயரானால்தான், அதில் ஏதோ புரியாதது இருக்கிறதென்று எல்லோரும் போற்றும்படி நேர்கிறது. இல்லாவிட்டால் கோணல்மூக்கு என்ற பொருள்கூறும் பெயர் குதூகலம் தர வாய்ப்பில்லை.

காந்தி என்ற பெயர் அழகான ஒலி நயம் உடைய பெயரென்றாலும், அதன் பொருள் வாசனை விற்பவர்கள் என்ற பொருளுடையதாம். ஒலியில் உள்ள உயர்வு பொருளில் இருப்பதில்லை.   நேரு என்ற பெயர் ஆற்றுக்கு அருகில் வாழ்ந்தவர்கள் என்று  பொருள்தருமாம்.  ஆகவே   நேரு என்பதற்கும் நீர் என்பதற்கும் உள்ள நெருக்கம் புரிகிறது.. ஆறு என்பது நீரோடும்வழியைக் குறிக்கிறது. பொருளால்  அதுவே நேரு என்பது.    நீர்> நீரு.> நேரு.  காசுமீரில் இவர்கள் ஆற்றுப்பக்கத்து வாணர்களாய் இருந்தனராம்.  இங்கு வருமுன் அவர்களின் குடும்பப் பெயர் வேறு என்று தெரிகிறது.  சிலர் கவுல் என்று நினைக்கின்றனர். மிர்சா என்ற முஸ்லீம் குடிப்பெயர்  "அமீர் ஷா" என்பதன் திரிபாம்.  இது கடற்படைத் தலைவர் என்று பொருள்படும் என்பர்.  நல்ல பதவியைக் காட்டும் பெயர்தான். அட்மிரல் என்ற ஆங்கிலச் சொல் அமீர் என்பதிலிருந்து பெறப்பட்ட தாகும்.  காலிங்கராயர் என்ற குடிப்பெயரும் கலிங்க அரசாட்சியில் பங்கு பற்றியோர் என்ற  பொருளைத் தருகிறது.

வால் என்ற சொல் தூய்மை என்ற பொருளுடையது.  மிகி - மிகுந்தோர்.  எனவே வால்மிகி என்பது பொருளின்படி ஓர் முனிவர் என்று பொருள்தரவேண்டும்.  மேலும் முதற் பெருங்கவி அவராதலின்  நல்ல பொருளையே அது தமிழில் தருகிறது. அவர் இராமாயணம் பாடியதற்கு ஏற்ற பெயராகிறது.  அது பின் சாதிப்பெயராய் ஆயிற்றா அல்லது முன்பே அப்பெயரில் அம்மக்கள் இருந்தனரா என்று தெரியாது.  பாணினி பாணன் ஆதலின் அவனும் எடுத்த எடுப்பில் கவிபாடும் ஆற்றல் உள்ளவன் என்றே தெரிகிறது.  இலக்கணம் இயற்றுமளவிற்குப் பேரறிவு படைத்தவன் அக்கவி.

பரஞ்சோதி என்பது இயற்பெயராய்த் தெரிகிறது.   சுவ என்பதி சிவ, சிவப்பு, செகப்பு, செம்மை, என்றும் பொருள்தரும்.  சிவப்பு என்பதைச் சுவப்பு என்று கூறுதல் உண்டு, சொக்கன் என்பது சிவனின் பெயர். சோபித்தல் என்பது ஒளிதருதல். தொடர்புகொண்ட சுவதி என்ற சொல்லே பின்னர் சோதி* என்றானது.  சோனல், சோனாலி என்ற பெயர்களையும் காண்க. பரஞ்சோதி என்றால் இறையொளி. பரஞ்சோதி என்பது இனிய பெயர். ஆனால் குடிப்பெயர் அன்று என்று தெரிகிறது.

சில குடிப்பெயர்கள் நற்பொருளுடையவை.  சில அல்லவெனினும் அவற்றின் பொருள் நோக்குங்கால் அறிய இயலாமையின் அவையும் தொடர்கின்றன.

திருத்தம் பின்.
காணப்பெற்ற பிழைகள் சில, திருத்தப்பெற்றன.  28.12.2018

கத்தியும் சத்திரியரும்.

கத்தி என்பது  ஒரு பேச்சுவழக்கில் எழுந்த சொல். இந்தச் சொல் கற்காலத்திலிருந்து தமிழில் வழங்கிவரும் சொல் என்பது  அதன் அமைப்பைப் பார்த்தால் நன்' கு புரிந்துகொள்ளலாம்.

இந்தியக் கற்காலமென்பது ஏறத்தாழ கி.மு. 1200க்கு  முந்தியது  என்பர். ( Before  Circa 1200 BCE -  1000 BCE. ).  முதலில் பொன்னைக் கண்டுபிடித்தார்களா இரும்பைக் கண்டுபிடித்தார்களா என்றால்,  பொன்னையே என்று ஊகிக்க வேண்டும். சொல்லாய்வுப் படி  இரும்பின் பெயர் "இரும் பொன் " என்பதன் திரிபு.  பொன்னை அறிந்தபின் இரும்பை அறிந்தபோது அதைப் பெரிய பொன் என்றனர் தமிழர்.  இரு (ம்) -  பெரிய. பொன் . -  சற்றுக் கலப்பான தங்கம். தூய தங்கம் சீனர்கள் பயன்படுத்துவர் .

இரும்பு ஆயுதங்களைப் பயன்படுத்த அறியுமுன் தமிழர்கள் கல்லால் ஆன ஆயுதங்களைப் பயன்படுத்தினர்.  கூரான கல்லைக் கொண்டு, தமக்கு வேண்டிய பொருள்களைப் பிளந்து துண்டுகளாக்கினார்கள்.  ஒரு பொருளைப் பகுத்துத்  துண்டாக்குவதற்குப் பயன்படுத்திய கல்லே கத்தி ஆனது.

கல் >  கல்+தி >  கல்த்தி >  கத்தி.

கத்தி பிற்காலத்து இரும்பால் செய்யப்பட்டது.  கல் என்ற சொற்பகுதி மறக்கப் பட்டது .  அது நல்லதே.

( சேலை என்ற சொல்லுக்குப் பொருள் மரப்பட்டை என்பது.  இப்போது நூலால் செய்து அணிந்தாலும் பெயர் அதுதான்.)

( சறுக்கி அருகில் செல்வது  சறுக்கரம்.  பின் உருளையால் அமைந்தாலும் அது சறுக்கரம் தான்.  அது சக்கரம் என்று திரிந்தது. )

இச்சொல்லில் இருக்கும் ல் என்ற ஒலி தி என்ற விகுதியின் வரவுக்குப்பின் ஒரு தடைபோலுமிருப்பதால் அது விலக்கப்பட்டது. இப்படித் தகர வரவால் லகர ஒற்று  மறைந்த சொற்கள் பலவாகும். (  நமது முன் இடுகைகளைப் படித்துப் பட்டியல் போட்டுக்கொள்ளலாம் ).

கல்+தி > கற்றி > கத்தி என்று காட்டினும் அதே.

வெற்றி என்ற எழுத்துமொழிச் சொல் வெத்தி என்று பேச்சில் வருவது போலுமாம்.  சிறு அம்பலம் என்பது சிற்றம்பலம் ஆகிப் பின் சித்தம்பலம் > சிதம்பரம் ஆகிவிட்ட திரிபுகளையும் அறிக.  அம்பரம் என்பதை ஈண்டு விரிக்கவில்லை.

கத்தியிலிருந்து யாமெடுத்துக்கொளவது கத்திரியர் என்ற சொல். இதுபின் சத்திரியர் என்று மாறி அயல் நூல்களுக்கும் சென்றது.

கத்தி கொண்டுபோராடும் தொழிலை மேற்கொண்டோர்,  கத்திரியர்.
கத்தி + இரு + இ + அர்.   கத்திரியர்,  பின் சத்திரியர்.   இதன் முன்பொருள் கத்தியுடன் இருப்போர் என்பது.  க - ச  திரிபு .   சேரலர்  >  கேரளர்  என்பது உதாரணம் .

கத்தியுடன் இருப்பவனைக் குமுகம் ஒருகாலத்தில் உயர்வாகக் கருதவில்லை.  இந்தக் காலம் மனுவின் காலத்துக்கு முன் ஆகும்.  மேலும் இறைவனை உணர்ந்தோர் போல் இவர்கள் அமைதியான குணம் உடையவர்களாகவும் இருக்கவில்லை.  கொலை முதலியன செய்ய அவர்கள் தயங்கியதும் இல்லை. "  மண்டை ஓடுகளின் மேலே நடந்து மண்டலத்தை ஆண்டவர்கள் " என்று கவியரசு கண்ணதாசன் எழுதியது இவர்களைப் பற்றித்தான். ஆனால் சட்டத்துறை அறிஞர்கள் தம் சிந்தனைக் கட்டுரைகளில் சொல்வதுபோல் முதலில் வலக்காரத்தால் நாட்டையே அலைக்கழித்தாலும் இறுதியில் அமைதியை நிலை நாட்டி, ஆட்சியை ஏற்படுத்தி முடி சூடியபின் ஒழுங்கை நிலைநாட்டிவிட்டால் கத்திரியர் ( கத்தி வைத்திருந்தாலும் குண்டுகள் வைத்திருந்தாலும் )  அல்லது ஆயுதபாணிகள்  அரசர்களாய்
உயர்ந்துவிடுகிறார்கள் என்பதை அறியவும். (When social order sets in and peace prevails,  legitimacy returns. )

குழப்பமான காலங்களில் நீதி  சட்டம் ஒழுங்கு என்பவை நிலை நாட்டப் படுதல் பற்றி இங்கிலாந்தின் டென்னிங் பிரபுவும்  பிரபுக்கள் அவையும் தந்த நீதி  முடிபுரைகள் சிந்தனைக்  கருவூலங்கள். (Lord Denning M R in the English Court of Appeal and House of Lords on a Rhodesian case ).  ஒரு காலத்தில் கெட்டது  இன்னொரு காலத்தில் நல்லதாகிவிடும்.

அச்சமே இல்லாதவனுக்குக் கத்தி எதற்கு?  இந்த வகையில், கத்தி இருப்போர் அச்சமுள்ளோர்.   இரிதல்:  அஞ்சுதல்.  இரிபு:  அச்சம். இன்னும் பிற பொருளும் உள்ளன.

ஆகவே கத்தி + இரியர் என்பதை  கத்தியுடன் அஞ்சி நின்றோர் என்றும்  பொருள் கொள்ளவேண்டும்.

இருப்போர் அச்சமுள்ளோர்.  பணம் இருப்போர் அஞ்சுவர்.  கத்தியிருப்போர் அஞ்சுவர்.

கத்தி + இரு  அல்லது கத்தி இரி என்று எப்படிக் கொண்டாலும் பொருள் அதுதான்.  கத்தி வைத்துக்கொண்டு ஆட்சி செலுத்தியவர்கள்.

நாம் கத்தி + இரு + இ + அர்  என்பதையே இங்கு கொள்கின்றோம்.

சத்திரியர் என்ற சொல்லுக்குச்  சரியான பொருள் தமிழே தரும்.

In the end:  அச்சத்தைப் போக்கியது  ஆட்சியை ஆக்கியது கத்தி

அறிக மகிழ்க.

மெய்ப்பு  - பின்னர்.

சீனாவிலிருந்து கடன்வாங்கிய மொழி இயல்புகள்.

ஒவ்வொரு மொழிக்கும் ஓர் இயல்பு அல்லது தன்மை என்பது இருக்கின்றது. ஒரு மொழியிலிருந்து இன்னொரு மொழிக்குத் சொல்தாவும்போது  இவ்வியல்பின் காரணமாகச் சொல்லானது மாற்றமடைகிறது.   இந்திய மொழிகளில் தருமம் என்ற சொல்,  "^தர்மா" என்று ஒலிக்கிறது என்பது உங்களுக்குத் தெரியும். இந்தச் சொல் மலாய் மொழிக்குள் ஏகும்போது  டெர்ம  derma என்று பலுக்கப்படுகிறது. ( மென்டர்ம menderma ).  ஆங்கிலத்திலும் இது டர்மா dharma என்றே ஒலிக்கிறது. இதனை இத்தனை கடின ஒலிகொண்டு வெளிப்படுத்துவது தமிழர்களின் நாவுக்கு ஒத்து வருவதில்லை. தமிழர் அல்லாத அவர்களெல்லாம் ''டர்ம"  என்று ஒலித்து மகிழ்வு கொண்டாலும் நாம் நமக்கு ஒத்தவாறு  "தருமம்"  (தருமத்தை ஒருநாளும் மறக்கவேண்டாம்) என்றுதான் பேசுகிறோம்.

இதே தருமம் என்ற சொல் இந்திய  எல்லை கடந்து சீனர்களிடையே போகுமானால் டர்மா என்பதுகூடப் பொருந்துவதில்லை. மண்டரின் மொழியின் இயல்புக்கேற்ப   "டம்மா" என்று மாறிவிடுகிறது.  அதாவது இடைஞ்சலாகத் தெரியும் ஒலியை விட்டுவிடுவர்.

"ஊட்லி" என்ற ஆங்கிலச் சொல்லை மண்டரின் மொழிக்குள் கொண்டுசெல்ல வேண்டுமானால்,  "ஊ-லி" என்றுதான் சொல்லவேண்டும்.   டகர ஒற்று  ( ட் ) இடையில் வந்து ஒலியொழுகுதலைத் தடுப்பதுபோலிருப்பதால், அவர்கள் நாவிற்குத் துன்பம் விளைகிறது.  குட் கட் மட் என்றெல்லாம் வல்லெழுத்துக்களைப் போட்டுப் பேசுவது அவர்களுக்குப் பழக்கமில்லை. கடுமையான உச்சரிப்பு.  என்ன குண்டுபோடுவதுபோல் டா டூ என்கிறான்!  என்று சீனப்பாட்டி  கோபித்துக்கொள்வாள்.  "பேசுகிறானா? எதையோ உடைக்கிறானா?......."

நம் பெயர் அவனுக்குக் கட்டமாக (கஷ்டமாக ) இருக்கிறது.  அவன்பெயர் நமக்கு இன்னலாகவும் நாவிடியாகவும் உள்ளது.

ஒருதடவை இங்கு தரப்படும் தகவுடைய  எடுத்துக்காட்டுகளைக் கேட்டுவிட்டால் மொழிகளில் ஒலிமரபு என்பது நன்றாகப் புரிந்துவிடும்.

பேசுவதற்கு முதன்மையானது நாக்கா அல்லது உதடுகளா?  பல மொழிகளில்உதடுகள் முக்கியமானவை. "Thy own lips hath said....." என்று விவிலிய நூல் மொழிபெயர்ப்பு வருகிறது.

பத்மா என்ற பெயரை Padma  என்று  ஆங்கிலத்தில் எழுதுகிறோம்.   மண்டரின் மொழியில்  "பா-மா" என்று சொல்லவேண்டும். மதுரை என்பதை....? Madura என்று சொல்வர். மண்டரினில்   மதுரையை  " மாராய்"  எனலாம்.   டேவிட் மார்ஷல் என்பதை "தாஹுவே மாஸியாவ்"  என்றுதான் சொல்லவேண்டும்.

கேடுது என்று அமைத்துப் பின் கேது என்று சொல்லாக்கம் செய்வதும்,  பீடு+ மன் (பீடுபெற்ற மன்னன்) என்பதை  பீமன்,  வீமன் என்று மாற்றுவதும் தரும என்ற சமஸ்கிருத வடிவத்தை தம்மா என்று பாலிமொழியில் மாற்றுவதும் -- இப்படிப் பட்ட தந்திரம்தான்.   நம்மொழியில் ஒலிமரபுப் படி பீடுமன் என்றே வைத்துக் கொள்ளலாம் என்றாலும்,  பீமன் என்று மாற்றுவது:  வேற்றுமொழி இயல்புக்கேற்ப மாற்றியமைப்பதாகவே கொள்ளலாம். மாற்றியமைத்தபின் அச்சொல் உருத்தெரியாமல் இருப்பது கதைகளை மறைமுகமாகத் தெரிவிக்கவும் உண்மைப்பெயர்களை  இரகசியப்படுத்துவதற்கும்  அமைத்த விதத்தை அறியமுடியாமல் செய்வதற்கும் நன்`கு பயன்படுவன ஆகும்.

இத்தகு வித்தைகளை நம் முன்னோர் நம் மொழிகளில் நன்`கு கையாண்டிருக்கின்றனர்.

யானைக்குப்  பெயர் ஒன்று வைக்கவேண்டி நேர்ந்தது.  அதாவது ஒரு பொதுப்பெயர்.  முன்னரே பலமொழிகளி லெல்லாம் வழங்கும் பெயர்களைக் கடன்வாங்கியிருக்கலாம்.  என்ன கடன்?  திருப்பிக் கொடுக்கவேண்டியதில்லையே.  பிறமொழிப் பெயரை எடுத்துக்கொள்ளலாம்.

ஆனால் பெயர் வேண்டும் என்று தீர்மானித்துவிட்டனர். யானையின் முகத்தை நோக்கினால் பல பக்கலிலும் கடைந்து செய்யப்பட்டதுபோன்ற தோற்றத்தைத் தருகின்றது. வாயில் பல் (கொம்பு) நீண்டமைபற்றி பன்றி என்று பெயரிட்ட மரபையே பின்பற்றி,  கடை+ஜா என்று வைக்கலாம் என்பது கூறப்பட்டது.  டையில் வரும் ஐகாரத்தைக் குறுக்கி,  கடஜா ஆக்கினர்.   அப்போதும் சரிப்படவில்லை.  டகர வல்லொலி நீங்காமல் நின்றுவிட்டது.  தமிழ் மொழியிலிருந்து எடுத்தால் இது ஒரு வேண்டாத இடர். என்ன செய்வது.  டகரத்தை எடுத்தனர். கடஜா ( முகம் கடைந்து பிறந்தது)  என்ற சொல் கஜா என்று மாறியது. இப்போது எவ்வளவு அருமையாக உள்ளது!!  கடையப்பட்டவனே என்பதினும் கஜனானனே   என்பது அருமை.  இந்திய சரித்திரம் எழுதிய ஜான் கே இப்பொருளைத் தம் நூலில் முன்வைக்கிறார்.

எடுத்துக்காட்டுகள்:

இடு  >  இட்டம் :    இடு > இடுச்சை > இச்சை .
பரி  + இடுச்சை >  பரீட்சை .

படி > பஜி :

முருகனைப் படி மனமே -  திருமால்

மருகனைப் படி மனமே.

படி என்பது பாட்டுப் படி என்று பொருள். படிப்பது வேறு பாடுவது வேறு என்று நீங்கள் வாதிடலாம்.  இரண்டும் அந்தக் காலத்தில் ஒன்றுதான்.  பாட்டுப் பாடு என்பது பாட்டுப் படி என்றாலும் அப்பொருளே தரும். அப்போதெல்லாம் நம் மொழி பாடும் மொழியாகவே இருந்தது.   எல்லா வாத்தியார்களும் தங்கள் பாடங்களைப் பாடியே கற்பித்தனர்.    படி+ அம் = பாடம் என்று கூறப்படினும் அங்கனமின்றி பாடு+அம் என்றாலும் பாடம் என்றே வருதல் காண்க.  பேசு + ஐ = பேசை > பாசை > பாஷை என்றாலும்   பாடு+ ஐ = பாடை> பாஷை என்பதும் பொருந்தியே வருகிறது.  தாயும் மகளும் என்றாலும் மகளும் தாயும் என்றாலும் ஒன்றுதான் என்று கூறுவது இதற்கு சரியாகிறது. இவையெல்லாம் இருபிறப்பிச் சொற்கள் என்றே கொள்ளவேண்டும்.  நிற்க, முருகனைப் படி என்பதில் பாட்டுத்தான் பாடச் சொல்கிறார்கள் என்று எடுத்துக்கொள்வோம். எதுவாயினும், வேற்றுமொழிக்கு ஊட்டமாகும்போது,  படி என்பதைப் பஜி என்று மாற்றி, 

முருகனைப் பஜி மனமே --  திருமால்

மருகனைப் பஜி மனமே

என்பதும் அழகாகவே உள்ளது.   படி  பஜி  அயற்செலவு உருவத்தை ஆராதிப்பீர்களாக.  பஜி என்பதிலிருந்து  பஜி+அன் + ஐ என்று இணக்குவித்து, பஜனை என்று புனையலாம்;  பஜி+அன் =  பஜன் என்று வனையலாம். எல்லாம் அழகாகவே உள்ளது.

தொல்காப்பியர் சும்மா சொல்லவில்லை.  வலிக்கும்வழி வலிக்கலாம்; மெலிக்கும்வழி மெலிக்கலாம்.  எப்படிச் செய்தால் சொல் அழகாய் அமையுமோ அப்படியே செய் மனமே.  நெடிது வாழ்வாய்.

இந்தமாதிரி தந்திரங்களையெல்லாம் சீனர்களிடமிருந்தோ கற்றனர். நம் சங்கதத்திலும் சீனச்சொற்களும் உள்ளனவே!
 Note:
After writing and completing a draft post the
writer reads through and makes certain changes and
saved them. After posting the computer is switched off. 
When the computer is restarted several hours later 
it is surprising to find  all edits missing and the
unedited version reappearing.  A virus or bug
is performing this unwanted service and increasing our
workload.
Now we have edited again. 

சொற்களைக் கடன்வாங்குதல்.

இப்போது எல்லா நாடுகளிலும் பல இன மக்கள் குடியிருக்கின்றனர்.  இப்படிப் பல மொழியினரும் அடுத்தடுத்து வாழ்வது ஒருவகையில் உலகப் புரிந்துணர்வுக்கு முதன்மையான வாய்ப்பு என்று சொன்னால் அது மிகையாகாது.

சிங்கப்பூரில் சீன மொழி பேசுவோரே மிகுதியாய் உள்ளனர். அவர்கள் தம் மொழியைப் பேசும்போது தொலைப்பேசி, உந்துவண்டி முதலியவற்றுக்கு ஆங்கிலச் சொற்களைப் பயன்படுத்துவது மிகவும் குறைவு.  உந்துவண்டிக்கு "ஹோங்க் சியா" என் `கிறார்கள்..இவர்களுக்கு ஆங்கிலச் சொல்லான "கார்" என்பது தெரியாமல் இல்லை. ஆங்கிலம் பேசும்போது கார் என்ற சொல்லைப் பயன்படுத்துவர்.

மலாய்க் காரர்களும்  உந்துவண்டிக்கு " கிரேய்த்தா"  என்ற சொல்லைப் பயன்படுத்துகிறார்கள்.  ஆனால் தொலைப்பேசிக்கு வேறுசொல் மொழியில் இல்லாத காரணத்தால் "தலிப்போன்" என்பார்கள். எழுத்தில் எழுதும்போதும் இச்சொல் ஒலிபெயர்த்துத்தான் எழுதப்படுகிறது.  மொழியில் சொல் இல்லாதபோது அயற்சொல்லைப் பயன்படுத்துவதில் தவறு எதுவும் இல்லை. சொந்தமாக மொழியில் சில சொற்களை அமைக்கப் பெரிதும் இடர்ப்பட வேண்டியிருந்தால் அயற்சொற்களையே சில வேளைகளில் ஏற்றுக்கொள்வதில் தயக்கம் ஏற்படலாகாது.

தமிழைப் பொறுத்த மட்டில் சொந்தச் சொற்களை உண்டாக்கிப் பயன்படுத்திக்கொள்ளும் வசதி நிரம்பி வழிவதாகவே சொல்லவேண்டும்.  பழஞ்சொற்களை ஆய்ந்துகாணும்போது இவ் வசதி மிக்கத் தெளிவாகவே நமக்குப் புலப்படுகிறது.  இலத்தீன் மொழி உருவெடுத்த காலை தமிழ் நாட்டுப் பண்டிதர்கள் அங்கு சென்று தம்மால் இயன்ற உதவிகளைச் செய்திருக்கின்றனர். நன்னூல் முதலிய நூல்களைப் படித்த வெள்ளைக்காரர்கள் அதனை ஐரோப்பிய மொழிகளில் மொழிபெயர்த்தது மட்டுமின்றி இலக்கணம் எப்படி அமைப்பது என்பதையும் கற்றுக்கொண்டனர். இதனால் ஆங்கிலமொழி பிரஞ்சு முதலானவை வளம்பெற்றன. தமிழிலும் சமஸ்கிருதத்திலும் காணப்பட்ட இலக்கணங்களை ஒட்டியே அவர்களும் அமைத்துக்கொண்டனர்.  பாணனாகிய பாணினியும் காப்பியக் குடியைச் சேர்ந்த தொல்காப்பியரும் சொன்னவற்றிலிருந்து மொழிநூல்  என்னும் கலையையும் உருவாக்கும் ஊக்கம் அவர்களுக்கு உண்டாயிற்று.

பகுதி, விகுதி. சந்தி. இடைநிலை. சாரியை என்றும் எல்லாம் உணரும் வாய்ப்பு அவர்களுக்குக் கிட்டியது.  தோன்றல், திரிதல், கெடுதல், குறைகள், மிகைகள் என யாவும் உணர்ந்துகொண்டனர்.  சுப்ரதீபக் கவிராயரின் மாணாக்கரான வீரமாமுனிவர் என்ற பெஸ்கியும் பின் போப்பையர் போன்றவர்களும் தமிழில் பெரும்புலமை பெற்றனர்.  பெஸ்கி பாடிய தமிழ் விருத்தப்பாக்கள் கம்பன் கவியின் சாயலை ஒத்து நின்று மிளிர்கின்றன.

எல்லாவற்றையும் படித்துக்கொண்டே இருந்தால் நீங்கள்தாம் புலவர்.
பிறமொழிச் சொற்களைக் கடன்பெற்று உரையாடும்  நிலையும் குறைந்துவிடும்.  ஆங்கிலம், இலத்தீன், சமஸ்கிருதம்  முதலியன படிக்கும்போது  அவ்வம்மொழிகளையே தூய்மையாகப் பயன்படுத்துங்கள்.
மலாய் பேசும்போது தமிழைக் கலக்கவேண்டியதில்லை.

எமது மலாய் ஆசிரியர்களில் ஒருவர் பின் ஓய்வுபெற்ற மலாய்மொழிப் பள்ளிக்கூடங்களின் ஆய்வகர்.  அவரிடமிருந்து தமிழனான அப்துல்லாவின்
"ஹிக்காயாட் அப்துல்லா"  முதலியவற்றையும் சில இலக்கியங்களையும் கற்று அறிந்துகொண்டேம் .  தொலைகாட்சியில் சீன நிகழ்ச்சிகளையும் மலாய் நிகழ்ச்சிகளையும் ஆங்கிலத்தையும் பாருங்கள்.

இந்தோனேஷியப் பாடகி பாரமிதா பாடிய ஒரு மலாய்ப் பாட்டைத் தமிழில் மொழிபெயர்த்துக் கவிதையாக எழுதியிருந்தேம்.  அது கள்ள மென்பொருள் தாக்கியதால் அழிந்துவிட்டது.  எமது கரட்டுவரைவுகளில் எங்கேனும் இருக்கிறதா என்று தெரியவில்லை. இருந்தால் வெளியிடுவேம். இந்தோனேசிய பாம்பாட்டிப் பாடகி மரணம் பற்றி ஒரு கவிதை எழுதினேம். அதுவும் காணவில்லை.

Crohn's Disease  என்பதற்கான தமிழ் மொழிபெயர்ப்பு இருக்கிறதா என்று தெரியவில்லை. இந்த நோய் உள்ள ஒரு உறவினரை மருத்துவமனையிற் சென்று கண்டேம். இப்போது அதைப்பற்றி மேலும் அறிந்துகொண்டிருக்கிறேம்.   நாம் தினமும் கற்றுக்கொண்டிருக்கிறோம்.
தினம் என்ற சொல்லின் அடிச்சொல் தீ என்பதுதான் என்று ஒரு தமிழ்ப்பேராசிரியர் ஆய்வுசெய்து முடித்திருந்தது இப்போது நினைவுக்கு வந்துவிட்டது.

சில வேளைகளில் பிற நாடுகளின் தளங்களிலும் சென்று பின்னூட்டம் செய்துள்ளேம். ஒரு தலைமை நீதிபதி வேலைப்பட்டியல் இடுவதில் நடத்தைக்கேடு தோன்றுமா என்பதுபற்றிய இந்தியாவில் ஏற்பட்ட வாதம் படிக்க இனிமையாகவிருந்தது.  சில தாளிகைகளில் தளங்களில் சென்று பின்னூட்டம் இரண்டு வெளியிட்டேம்.

நாம் வாழும் உலகில் பல இன மனிதர்களும் பல மொழிகளும் பல ஆய்வுக் கருத்துகளும் உள்ளன.

மீண்டும் சந்திப்போம்.

திருத்தம் பின்பு.

கச்சடா என்ற சொல்.

கச்சடா என்ற சொல் தமிழானால் அதற்கு ஒரு தமிழ் மூலமிருக்கவேண்டும். இதற்கு மூலத்தை அறியுமுன் சில தொடர்புடைய சொற்களைக் கவனிப்போம்.  சொற்களுக்கும் மூலமும் உறவு முறைகளும் உண்டு என்பதை
சில சொற்களைக் கொண்டே நீங்கள் தாமே அறிந்துகொள்ளலாம்.

கஞ்சல் என்ற சொல்: அழுக்கு, குப்பை, கூளம், எளியது ( அதாவது உயர்வு ஏதும் இல்லாதது ) என்று பொருள்படும். உலக வழக்கில் அருகியே காணப்படுகிறது. கஞ்சன் என்ற சொல் கஞ்சல் என்பதற்கு அணுக்கமாகத் தோன்றுவதாகும். இது
உலோபி,  முடவன் , குள்ளன் என்று பொருள்தருமேனும்  முன்சொன்ன பொருளிலேதான் பெரிதும் உலகவழக்கில் அறியப்படுகிறது,  கச்சா என்பது தாழ்வானது என்று பொருள்படும்.  கச்சா எண்ணெய் என்பது தூயதாக்கப்படாத கல்லெண்ணெய். (பெட் ரோல் ).   கசடு என்பது திருக்குறளில் வரும் சொல். கற்க கசடற கற்பவை என்கிறார் திருவள்ளுவர்.  கசடற என்றால் குற்றமில்லாமல், ஐயம் திரிபு அற என்று ஆசிரியர்கள் நமக்கு அறிவித்திருக்கிறார்கள்.

இனிச் சொல்லமைப்புகளைக் கவனிப்போம்:

அடிச்சொல் :  கச.

கச  -  கசப்பு   (கைப்பு, வெறுப்பு, சில மூலிகைகள்)
கச  -  கசலை   (துன்பம்).
கச -   கசனை (   ஈரம்,  காவி  இன்னும் சில)
கச -   கசாகு  ( விரோதம்,  பாம்பு)
கச -  கசாகூலம்  ( குப்பை,  கூளம், சாதிக்கலப்பு)
கச -  கசிதல்  : ( ஊறிவழிதல்,  வேண்டாத வழிதல் . இரங்குதல்  இன்னும்  )
கச -  கசமலம் ( அழுக்கு,  கெட்டது)
கச -  கசம்  ( அழுக்கு :  கசம்பிடித்தவன் )
கச -  கசமாலன்  :   (கெட்டவன் )
கச -  கசமாலி  ( மேற்படி)
கச -  கச்சம்  ( ஊற்று,  இன்னும் பல)
கச - கச்சல்  ( வெறுப்பு , கசப்பு,  ஒல்லி)

• கச - கச்சளம்  ( இருள்)

இது இன்னும்  பல வடிவங்கள் கொள்ளும்.

கஞ்சல் என்பதும் உள்ளது. ( அழுக்கு முதலியவை).

அஞ்சுதல் அச்சம் என்றும் எஞ்சுதல் எச்சம் என்றும் அமையும்.

இவற்றிலிருந்து  ஞ்ச > ச்ச திரிபும் உணரலாம்.

பெரும்பாலும் கச என்பது வெறுப்புக்குரியதைக் குறிக்கிறது.

கச + அடை = கச்சடை >  கச்சடா  என்றாகும்.

அடு > அடை.
அடு > அடா.  ( ஆ விகுதி ).

கச்சல் என்பதனுடன் தொடர்புள்ள சொல்.

கச்சடா என்பது அடர்வான அழுக்குப் படை என்று பொருள்.

சில சொற்களே தரப்பட்டன.  வேறொரு சமயத்தில் மற்றவை அறிவோம்.

kasa  original meaning:   bitter.  Note:  cha > sa softening pronunciationwise 
kasa  derived meaning:  something detestable.  not likable.
To note:  jcha > chcha  word corruption. eg:  anjchu > achcham.

Extra dots inserted by hacker have been removed.
Will review

சிங்கப்பூர்க் கரடி நோத்துயர் மறைவு

பாவம் துருவம்  ஒருவிப் பிறந்த
காவல் மிகுந்த துருவக் கரடி.

செய்பனிச் சூழலில் செம்மை செழிக்க
உய்வுற வளர்ந்த ஒண்மை வளர்ப்பு!

இருபத் தேழு எழில்நல் ஆண்டுகள்
அரும்பதிச் சிங்கை விலங்கியல் தோட்டத்துச்

செல்லக் கரடியாய்ச் சீர்பெறு வாழ்நாள்
உள்ளுதொ றினிக்கத் துள்ளும் துடிப்புடன்

தந்து  நிறைத்தது  தாழ்விலா வாழ்வதே.
உந்திப் பலருளம் உவகையில் மேற்செல

மங்கையர் சிறுமகார் மாணுடை ஆடவர்
சிங்கையர் யார்க்கும் சேர்த்தது மாற்றம்.

நன்மருத் துவர்கள் நாடி அரில்தபப்
பொன்மனங்  கொண்டு பொருத்திய முடிவால்

தானியற் கைதனை வீண்வலி அகற்ற
மேனிலைப் படவே எய்தி மறைந்தது.

இருக்கலாம் இனியே பெருக்குறு நோயுடன்
உறுத்தும் மாத்துயர் மலையுயர் வருத்தம்.

என்றினிக் காண்போம் இனுக்காக் கரடியே?
மென்றுணை புரந்தாய் நீயே
நன்றினி நினைத்துப் புலம்புவ தன்றியே.

 அரும்பொருள்:

துருவக் கரடி :   polar bear
ஒருவி :  விலகி,  நீங்கி.
This bear was Singapore born.
செய்பனி : செயற்கைப் பனிச் சுற்றுச்சார்பு.
உய்வுற :  மேலோங்கும்படி
ஒண்மை : ஒளி பொருந்திய தன்மை
அரும்பதி :  அழகிய நகரம்
உள்ளுதொறு இனிக்க: நினைத்தாலே இனிமை
 சேர்க்கும்படி
மாற்றம் : வாழ்க்கையில் மாற்றம்.
அரில் தப -  ஒரு குற்றமும் இன்றி;
பெருக்குறு நோயுடன்:  நோய் மிகும் நிலையில்
மாத்துயர்: பெரும் துன்பம்.
இனுக்கா : கரடிக்கு வைத்த பெயர்.
மென்றுணை:  மெல்லிய துணை.


https://www.straitstimes.com/singapore/singapore-zoos-inuka-the-polar-bear-put-down-at-27-on-humane-and-welfare-grounds 
 

பிராம்மணர் இயல்பும் சூத்திரர் மேன்மையும்.

உண்மை விளம்புவதானால் பெரும்பாலான மக்கட்கு  அவர்களின் முப்பாட்டன் வரையில் நினைவில் இருக்கலாம். முப்பாட்டனின் முப்பாட்டன் வரை போவதானால் பலருக்கு நினைவிலும் இல்லை; அதற்கான பத்திரங்களும் கிட்டுவதில்லை. ஆனால் சீனாவின் சிங்கியாங்க் மாகாணத்துப் பழங்குடிகள் பல தலைமுறைகள்வரை தாம் அங்கு வாழ்ந்ததற்கான ஆதாரங்களை வைத்திருக்கிறார்கள் என்று ஒரு கட்டுரையில் படித்து வியப்பில் ஆழ்ந்தேன்.  இறந்துபோன முதாதையர்களை நினைவிருத்திக்கொள்ளும்  விதமாகச் சில இனங்களிடை "முன்னோர் வழிபாடு" நடந்துவருவதாகவும் கேள்விப்படுகிறோம். எல்லா வழிபாடுகளும் இருந்தபோதிலுமே ஜெங்கிஸ்கானும் குப்ளாய்கானும் படையெடுத்து வந்து நிலங்களையும் நாட்டையும் கைப்பற்றிக்கொண்டபோது, இந்த ஆதாரங்களை எல்லாம் உடையவர்களாய் இருந்தபோதிலும் அவர்களாலும் ஒன்றும் செய்யமுடியவில்லை. நிற்க:

பிராமணர்கள் எப்படித் தோன்றினர் என்பது ஒரு பெரிய மாந்த வளர்ச்சி நூல் ஆராய்ச்சியாகவே இருந்துவந்துள்ளது.  மதத்துக்கு அதிக எண்ணிக்கையிலான பூசாரிகள் தேவை ஏற்பட்டகாலை, பூசாரிகள் அல்லாதவர்கள் போதுமான பயிற்சி அளிக்கப்பட்டுப் பூசாரிகளாக அமர்த்தப்பட்டனர் என்றும் பலர் அதிலிருந்து பிற+அந்தியங்களுக்கு (பிராந்தியங்களுக்கு ) (  பிற மூலை முடுக்குகளுக்கு) கொண்டுசெல்லப்பட்டனர் என்றும்  சொல்கிறார்கள்.  எல்லாம் உண்மையாய் இருக்கக்கூடும்.

பிற்காலத்தில் மனுதர்மம் முதலிய நூல்கள் எழுந்தகாலை இந்தச்  சரித்திர ஆய்வு எதுவும் நடத்துவதற்கு அவர்களுக்கு நேரம் இருந்தது என்று நாம் நினைக்கவில்லை. அவர்களுக்குள் ஓர் உரையாடல் நடைபெற்றது.

இப்படி:

பிராம்மணா எங்கிருந்து வந்தனர்?

இதற்கு யாருக்கும் பதில் சொல்ல முடியவில்லை.  அதிலொருவர் எழுந்து
"தெரியத்தான் இல்லை" என்று சொல்ல, இன்னொருவர்:

ஏன் தெரியவில்லை?  பிரம்மனை விட்டால் மிச்சமிருப்பது "ணா".  அதிலிருந்துதான் வந்தார்கள் என்று நல்லபடியாக பதில் சொல்லி முடித்தார்.

உண்மையும் அதுதான்.  பூசாரியின் வேலையில் முக்கியம் நாவுதான். நாவைத்தான்  ணா  என்று சொன்னார்கள். நாவு வாயில் இருப்பதால் அப்படியே மனுதரும நூலிலும்  எழுதினார்கள்.

அல்லாதாரெல்லாம் தொழிலால் வேறுபட்ட நிலையினர் ஆதலின் அவர்களும் வாயிலிருந்து வந்தார்கள் என்று சொன்னால் அது ஆராய்ச்சி ஆகாது.  ஆகவே மற்றவர்கள் வேறு இடங்களிலிருந்து வந்ததாகச் சொல்லப்பட்டது.  எல்லோரும் பிரம்மனின் உடற்பகுதிகளிலிருந்துதான் வந்தனர். காலில்லாமலா உடல்?

இவற்றுள் காலே முக்கிய இடம்.  பிரம்மன் நிற்பதும் நடப்பதும் எல்லாம் காலால்தான். நெஞ்சும் வயிறும் இருந்தாலும்  அவற்றுள் பெரிய விடயம் எதுவுமில்லை.  அவர் சண்டைக்கும் போகமாட்டார். சாப்பிடவும் மாட்டார். காரணம் அவர் கடவுள். காலால் உலகின் கடைக்கோடிக்கும் சென்று மக்களை
நலம் உசாவ வேண்டுமாயின்,  கால் அங்கெல்லாம் கொண்டுசென்றாலே வாயால் கேட்க முடியும்.  காலே முதன்மை வாய்ந்தது.   மேலும் ஒரு செம்பு தண்ணீர் ஊற்றினாலே கால் தூய்மை அடைந்துவிடும். வணங்குகிறவர்கள் அங்குதான் வீழ்ந்து வணங்குவர். அவர் கால் துயவை அல்லாதவை எனின் 
பத்தர்கள் ( பற்றாளர் ) அவற்றை வணங்குவ தெவ்வாறு ?

மேலும் இடத்தால் கீழிருப்பவை கீழ்மை உடையவை அல்ல. இடத்தால் மேலதான தலைமயிர் உயர்வானதும் அன்று. உதிர்ந்தால் ஒதுக்கப் படுவது அது. நிரந்தரம் இல்லாதது.

காலில் வந்தோருக்கு சூழ் திறம் உடையார் என்று பெயரிட்டனர்.  சூழ்திறம் என்பது  சூத்திரம் என்று திரிந்தது.  பல திறங்களையும் சொந்தமாகவே கண்டுபிடித்தவர்கள்:  சூழ்ந்து -  எண்ணிக் கண்டுபிடித்து;  திறர்கள்:  திறம் காட்டியவர்கள். அதாவது அவர்கள் கண்டுபிடித்ததனைத்தும் அவர்கள் சொந்த அறிவால் கண்டுபிடித்தது. (பிரம்மன் கண்டுபிடிக்கவில்லை).

நான் கண்டுபிடித்துக் கொடுக்காத பல இவர்களே கண்டுபிடித்து விட்டார்களே  என்று பிரம்மன் அசந்துபோய் இருக்கிறார். ஆனந்தமே.

பூசாரியின் மந்திரங்களெல்லாம் பிரம்மன் சொல்லிக்கொடுத்தவை. ஆனால் சூத்திரர் என்பாரோ கண்டுபிடிப்பாளர்கள்.  சூத்திரம் சொல்லும் உயர்ந்தது; செயலும் உயர்ந்தது. தம்காலால் நின்று வாழ்வோர் சூத்திரர்.

பிரம்மன் வாய் பேசும்:  ஆதலால் மந்திரங்கள் புனையமுடியும்.  கால் பேசா. ஆகையால் வேலைகளையெல்லாம் சூழ்ந்து (ஆராய்ந்து) கண்டுபிடித்துக் கொண்டனர்.

பிரம்மன் வாயும் மந்திரங்களை மறந்த வாய். அப்புறம் முருகக் கடவுளே மீட்டுருவாக்கம் செய்துகொடுத்தார் என்`கின்றன புராணங்கள்.  சூழ் திறத்தவரான சூத்திரர்., -- யாரும் அவர்களுக்குச் சொல்லிக்கொடுக்கவுமில்லை; எதையும் மறக்கவும் இல்லை.

கால் இல்லாவிட்டால் பிரம்மன் எப்படி நடமாடுவார்?  ஆகையால் காலின் முதன்மையை உணர்ந்து  சூத்திரம் என்ற சொல்லையும் தெளிந்த கண்களுடன் பார்த்து உயர்வு காண்பது யாவர் கடனுமாகும்.

பிரம்மன் காலால் நடைபெறும் உலகம்
 

சில நல்ல இடைக்குறைச் சொற்கள்.

வள் = வளைவு.

வள்+ தி = வண்டி.  ( உருளை பொருத்தியது ).

வாங்கு = வளைவு.

வாங்கு+ அனம் =  வா(ங்)கனம்.

வளையம்போன்ற உருளை கண்டுபிடிக்கப் படுமுன், ஊர்திகள்  (பல்லக்குப் போல ) தூக்கிச் செல்லப்பட்டன.  ஆள் தூக்குதல், விலங்கு தூக்குதல் எல்லாம் ஒன்றுதான்.  தூக்க வசதி இல்லாத நில இறக்கங்களில், “ வண்டிகள்” அல்லது இருக்கைகள்  சறுக்க விடப்பட்டன. இதில் கயிறு கட்டி இழுப்பதும் அடங்கும். சறுக்க வசதியாக கீழ்ப்பாகம் அமைக்கப்பட்டது.  சறுக்கி அருகில் சென்றது,  சறுக்கு+ அரு+ அம் = சறுக்கரம் ,   இது பின் சக்கரம் ஆனது.   அருகுதல் = நெருங்குதல்,  அண்முதல்.  அடிச்சொல்: அரு.    உருள்வளை அமைந்த பின்னும் அது  சக்கரம் என்றே வழங்கியது.  

முதலில் இருக்கையின் கீழ் அரை வளையமாகப் பொருத்தப்பட்டு,  பின் சுற்றும்படி முழு வளையமாக இணைக்கப்பட்டது.  நல்லபடி சுற்றும் வளையம் அமைக்கக் காலம் பிடித்திருக்கலாம்.

ஒப்பாய்வு:-

துறக்கம் என்ற சொல் சொர்க்கம் என்றும் பொருள்படும். ஒருவன்   துறக்கம் சென்றுவிட்ட நிகழ்வானது இங்குள்ளோருக்குத் துக்கமே ஆகும்.   ஆதலால்
இச்சொல்லின் இடைக்குறைக்குத் துயரப்  படுதல் என்ற பொருள் ஏற்பட்டுவிட்டது.



துறத்தல்:
துற >  துறக்கம் >  து(ற)க்கம் >  துக்கம்.   இது இடைக்குறைச் சொல்லமைப்பு ஆகும்.

மேலே தரப்பட்ட சறுக்கரம் என்ற சொல்லும்  தன் றுகர எழுத்தை இழந்து சக்கரம் ஆனது.  இடைக்குறைச் சொல்லமைப்பு.

வாகனம் :
வாங்கு -  வளை.
வாங்கு+அன்+அம் =  வாங்கனம் >  வாகனம்.  இதுவும் இடைக்குறைச் சொல் அமைப்பு.  பின் பிறமொழிகளிலும் பரவிய சொல்.


reviewed.
date:    25.4.2018

A reflection on her own funeral by a Singapore Uni student.

ஒரு பத்தொன்பது அகவையே நிரம்பியிருந்த காலை ஒரு சிங்கப்பூர் பல்கலைக் கழக மாணவி தம்முடைய துக்கதினம் எப்படி நடைபெறும் என்பதைத்  தாமே  எழுதினார்.  பின் எதிர்பாராத விதமாக சிங்கப்பூரில் ஒரு
வாகன விபத்தில் காலமாகிவிட்டார். இப்பெண்மணி  எழுதிய துயரக் கட்டுரை இப்போது " தி இண்டிபென்டன்ட்   சிங்கப்பூர்" என்ற இணைய நாளிதழில்
வெளியிடப்பட்டுள்ளது. இவ் வாங்கிலக் கட்டுரையைப் படித்துவிட்டு
ஆன்ம அமைதியை அவர்க்கு வேண்டிக்கொள்ளுங்கள்.

19-year-old NUS student killed in Clementi crash had written a reflection on her funeral prior to her untimely passing

http://theindependent.sg/ 

 

The Independent

Errors inserted by virus after posting 

have been  rectified. A copy is retained

to ascertain the pattern followed by the

virus.

 

உடை வாளுக்கு இன்னொரு பெயர்.

நாம் வரலாற்றில் ஓராயிரம் ஆண்டுகட்கும் சற்று கூடுதலாகப் பயணித்தோமானால், அக்காலத்தில் தமிழரசர்கள் ஆட்சி நடாத்திக்கொண்டிருந்தனர். அன்றைய அரசுகள் பெரிதும் தமிழையே பயன்படுத்தியதால் இன்று நாம் எதிரிகொள்ளவியலாத பல

தமிழ்ச் சொற்கள் வழக்கிலிருந்தன.  தமிழரசுகள் மறைய மறைய அச்சொற்களில் பல வழக்கிழந்து போயின. அவற்றை முதலில் மறந்தவர்கள்  தமிழகத் தமிழர்கள் என்றே எண்ணத்தோன்றுகிறது. இவற்றில் சில சொற்கள்  பிறமொழிகளிற் குடியேறின. அப்படிக் குறியேறித் தமிழில் முற்றும் அழிந்துவிட்ட சொற்களை, மொழியில் சொல்லாய்வின்மூலம் மீட்டுருவாக்கம் செய்தல் இயலக்கூடியதே ஆகும். அப்படிச் செய்யும்போது தமிழில் இப்போது  காணக்கிடைக்காதமையினால் அவை தமிழ் அல்லவென்று சிலராற் கொள்ளப்படுதலும் இயல்பானதே ஆகும். இதன் காரணம் அவை இங்கு இல்லாமற் போனமைதான்.  எனினும் அத்தகு சொல்லின் மூலத்தை ஆய்வதன்வழி அதனை அடையாளம் கண்டுகொள்ளலாம்.

சேவகர்கள்

மேலாளர் இட்ட வேலைகளைச் செய்தவர்களே சேவகர்

கள். இச்சொல்லில்  இரண்டு துண்டுச்சொற்கள் உள்ளனவாகையினால் இதன் இறுதித்துண்டு அகர் என்பதே.  ஆனால் "சே"  என்பது சிவப்பு என்பதே இப்போது காணக்கிடைக்கும் பொருளாகும். சிவப்பு அகர் என்று பொருள்கூறினால் பிழைபடுகிறது, சேவகன் ஒருவன் செய்யும் வேலைக்கும் சிவப்பு அகத்துக்கும் தொடர்பில்லை ஆகிறது. ஆயின், செய்தல் என்பதனடிப் பிறந்த செய்தி என்ற சொல்லும் சேதி என்று திரிவதால், தி என்ற விகுதியை நீக்க. மீதமிருப்பது சே ஆகிறது.   எனவே செய்தி என்பதுதான் சேதி என்று திரிந்தது என்பதையும்,  செய் என்பது சொற்களில் சே என்று திரியும் என்பதையும் உணர்ந்துகொள்கிறோம். இவ் வுணர்வினை சேவகன் என்ற சொல்லுக்குள் செலுத்த,  சேவகன் எனல் உண்மையில் செய்வகன் என்று அமைந்து பின் சேவகன் என்று திரிந்தபின், மூலத்தை இழந்துவிட்ட  பற்றுக்கோடற்ற சொல் என்பது புரிகிறது,

இதனை:

செய் > செய்வு > செய்வகன் > சேவகன் 

என்று விளக்கலாம்.  ~வகன் என்ற ஒட்டு,  புணர்ச்சித் திரிபை உள்ளடக்கிய 

ஒன்றாதலின், செய் > சே என்பதே இங்கு அறிதற்குரிய திரிபு ஆகும்.

ஆனால் செய் என்பது சை என்றும் திரியும்.  செய்கை > சைகை.  இங்கனமே

புன்செய் எனற்பாலது புஞ்சை என்று  ~சை ஆகவும் திரியும்.

சொற்களை நன் கு ஆய்ந்தாலே இது அகப்படும்,

உடைவாள் அல்லது இடைச்சுரிகை

பண்டைக் காலத்தில் சேவகர்கள் அல்லது படைவீரர்கள், உடைவாள் அணிந்துகொண்டனர். இதை  இடையில் சொருகிக்கொண்டனர்.  சொருகு என்ற சொல்லும் சுருகு என்ற பேச்சு வழக்கில் இன்னும் உள்ளது.  இடையில் சுருகிக்கொண்டமையால் இடைச்சுருகு+ஐ =  இடைச்சுருகை>  இடைச்சுரிகை

என்ற சொல் அமைந்தது. இதில் இடைச்சுருகை என்பது வழக்கற்றதுடன் அதன் திரிபாகிய இடைச்சுரிகை என்பதை விட்டுச்சென்றுள்ளது.  ரு > ரி திரிபு  பிறசொற்களிலும் காணப்படும் திரிபேயாம்.

இப்போது உடைவாள் அல்லது  இடைச்சுரிகை என்பது ஒரு வரலாற்றுப் பொருளாகிவிட்டபடியால் இச்சொல்லும் வழக்கில் அருகிவிட்டது என்` க.

திருத்தம்பின்

Chinese and Tamil comparative study.

(kal)= stone, compare with Chinese words

Posted on November 4, 2010 by bishyamala

கல் > கல்லு. (தமிழ்)
க (பச்சைக்கல்) (stone ) (சீன)
லி – (சிறுகல்/ விலைமதிப்புள்ளகல்)
ஒப்பிடுக: கல் > கல்லு > லு > லி.
லியு = லி (சீன) சிறுகல்.
லு (சீன)= (பொருள்) எழுது
தமிழ்ச் சொல்லமைப்பு:-
இல் > இலு > இழு > இழுது > எழுது.
இல்> இலக்கு
இல் >இலக்கு > இலக்குதல் > இலக்கித்தல்.= எழுதுதல், வரைதல்.
இலு (தமிழ்மூலச்சொல்) : லு (சீனச்சொல்)
கல்லைக் குறிக்கும் லு என்னும் சொல் எழுது என்று பொருள்படுவதால், கல்லால் பண்டை நாளில் எழுதினரோ என்பது ஆய்வுக்குரியது.
இது ஓர் ஒப்பாய்வு. எதிலிருந்து எது வந்தது என்பதன்று.
_________________

Study made in 2010   Sivamala

Some Chinese words are also found in Skrt.

குருவி மரத்திலொரு- தந்திரம்

அந்த மரத்திலொரு குருவி — நான்
அறியா ஒலியினில் பாடியதே!
அந்தி மயக்கினிலே நழுவி — மனம்
அங்கு கவனத்தில் ஓடியதே.

என்ன இசையிது சொல்வாய் — என
யானும் ஆவலொடு கேட்டுநின்றேன்;
உண்ணப் பூச்சிபுழு கொல்வேன் –அவை
ஓலம் இட்டவொலிப் பாட்டென்றதே.

தனது செயலைப்பிறர் மேலே– போடும்
தந்திரம் உனக்கும் வந்ததுண்டோ?
மனிதர் என்பவரைப் போலே — சென்று
மாறும் அடிச்சுவடு முந்தியுண்டோ?

sivamala

அகவை, வயது.

வை -  வைத்தல் என்பது  தமிழில் உள்ள வினைச்சொற்களில்
நல்ல பல சொற்களைப் படைத்துத் தந்த தாய்  ஆகும்.

வை > வையம் என்பது பூமியைக் குறித்தது. தமிழன் உலக நோக்கு
உள்ளவன் ஆதலின், அவன் தான் மட்டும் வாழவேண்டும்
என்று நினைக்காமல், கடிதம் ஏதேனும் எழுதும்போதெல்லாம்
"வாழ்க வையம்" என்று பிள்ளையார் சுழிக்குக் கீழே எழுதி
மகிழ்வான்.   வை+அம் = வையம் ஆனது.  அம் விகுதி
இல்லாமல் அகம் என்ற சொல்லும் சேர்த்து. வையகம்
என்ற சொல்லையும் படைத்தான். தமிழ் என்பது செய்யுளில்
வளர்ந்த மொழியாதலின், வேண்டியாங்கு வையம் என்றோ
வையகம் என்றோ இரண்டில் எதையும் பயன்படுத்திக்
கொள்ளலாம். இப்போதெல்லாம் கடிதம் என்பது
அரசுக்கோ குழும்பு அலுவலகத்துக்கோதான் எழுதுவோம்.
நண்பர்களுக்கு எழுதுவதெல்லாம் குறுஞ்செய்தி ( எஸ் எம் எஸ்)
யாகவோ மின்னஞ்சலாகவோ இருக்கும்.  வையகம் வாழ்க
என்ற நல்ல எண்ணம் இப்போது உள்ளதா ஒழிந்துவிட்டதா
என்று தெரியவில்லை.

வையத்தை விட்டுவிட்டால் வேறோர் இடம் உள்ளது.  அதுதான்
வையாபுரி.  சிங்கப்பூர் கோலாலம்பூர் மணிலா போன்றவை
மனிதன் கட்டிய நகரங்கள்.  வெறும் நகரங்களா? உல்லாச
புரிகள். மகிழ்வு தரும் நிகழ்வுகள் இந்நகரங்களிற் பல.  ஆனால்
மனிதன் கட்டாத வானத்தில் உள்ளதாக நம்பப்படும் நகரமே
வையாபுரி. இங்கே உள்ளவை எல்லாம் மனிதன் வைத்த
நகரங்கள்.  வான் நகரோ மனிதன் வைக்காத =  வையாத
புரி.  மனிதன் வைக்காதது மட்டுமன்று, அங்கு எல்லோரும்
நித்திய இன்பத்தில் திளைத்திருப்பதால் யாரும் யாரையும்
வைவதும் இல்லை.  மொத்தத்தில் அது ஓர் அமைதிப்
பூங்கா என்று சொல்லலாம். ஒரு பெரிய வீட்டை வைத்து
மகிழ்ந்திருக்கும் வேளையில் வையாத புரியையும் எண்ணி
மெய்யான இன்பம் அடையத்  தடைகள் யாவையும் இல்லை.

நீங்கள் எதையும் வைத்திருக்கலாம்.  வை என்பது வய்
என்றும் திரியும்.  பை> பையன்.  பை>பய்>பயல்
என்று திரிபுகள் காண்க. அதுபோலவே  வை>வய்>
வயம்.  எதை எவன் வைத்திருக்கிறானோ அது அவன்
வயம் உள்ளது.  பின் பயல் > பசல்> பசன் என்று ய-ச
திரிந்ததுபோல வயம் என்பதும் வசம் ஆனது.

நாமெல்லாம் காலத்தின் வயப்பட்டு நிற்கிறோம்.
நாம் பிறந்த தேதி முதல் காலத்தின் வயமாவதால், இந்த
வயமாகும் கணக்கே "வயது" ஆகிறது.  வயது என்றால்
காலத்தால்  வைக்கப்பட்ட கணக்கு. வயப்பட்ட கணக்கு.\
இன்னொரு வகையிற் சொன்னால் நாம் காலத்துள்
அகப்பட்டுக் கொண்டிருக்கிறோம்.காலத்தின்
அகத்தே பட்டுக்கொண்டதால் அல்லது வைக்கப்
பட்டிருப்பதால்    நாம் அகவையை ஆண்டுதோறும் கூட்டிக்
கொண்டிருக்கிறோம். அகவை: காலத்தின் அகத்து
வை!  அக+வை.

இன்னும் பருவங்களும் புவியில் ஏற்படுகின்றன.  எல்லா
உயிர்களும் இப்பருவங்களின் வயப்பட்டுக் கிடக்கின்றன.
அவற்றுள் தென்றல் வீசியும் பூக்கள் பூத்தும்  சுனைகள்
நீர்வழங்கியும் எல்ல உயிர்களை யும் வயப்படுத்தும் காலம் :
வயந்தகாலம்.  அது  ய-ச திரிபால் வசந்த காலம் ஆயிற்று.
வசந்தத்தின்போது கிட்டிய - கட்டிய மாலை வயந்தமாலை>
 வசந்தமாலை.  அதை அணியும் குமரி - குமாரி :  வசந்த குமாரி
ஆகிறாள்.

எதை எங்கு வைக்கிறோமோ அது  வை> வாய் ஆகிறது.
வாய் என்பது இடம்.  எதை எங்கு இடுகிறோமோ அது  அதற்கு
இடம் ( இடு+ அம்).

இப்படி வை என்ற சொல் பல சொற்களுக்குத் தாய்.  அவற்றுள்
நாம் இங்கு அறிந்தவை சில.  அறியாதவை பல,

திருத்தம் பின்.

Visit to Greenland பசுநிலப் பயணம்

கிரீன்லாந்து என்பதொரு நாடு. அங்கு காணக்கிடைக்கும்

இயற்கைக்காட்சியைச் சுருங்கக் கூறுவது இக்கவிதை.




0000000000-----------------------00000000

இரவு பன்னிரண்டில்
எல்லோன் விழித்தொளியே
பரவும் வகைபணியே
பார்க்கும் வியப்பினையே ----(1)



அறவே காண்பதில்லை!
ஆசியத் தென்பகவில்;
பறவை ஊர்தியிற்போய்ப்
பார்ப்பீர் பசுநிலத்தே.                 (2)

இரண்டொரு நாட்களுக்காம்
இரவுகண் திரக்குவதால்
வரண்டிடும் கண்ணுறக்கம்;
வாழ்க்கை பலவிதமே.              (3)

கட்டிப் பனிமலைகள்,
காணும் இடமெங்கிலும்;
ஒட்டிச் செலவியலா
ஒப்பில் குளிர்வதையே.           (4)

பனியிற் சுருண்டபடி
படுத்திருக்கும் நரியே
தனிமைத் துயரறியா
தலைமை விலங்கினமோ?     (5)

விலக்கி வீடுகட்டி
விரல்விட் டெண்ணும்படி
கலக்கப் பரந்துறையும்
கடனார் வளமக்களே.                (6)

மீனே மேலுணவாய்
மேலாம் வாழ்நரிவர்.
மானும் மயிலுமில்லா
மாவண் திறத்தினிலே.              (7)

பொருள்:

பன்னிரண்டில்:   மணி பன்னிரண்டு நள்ளிரவில்.
எல்லோன்:  சூரியன்
பணியைப் பார்க்கும்:  வேலை செய்யும்.
ஆசியத் தென்பகவில்:  தென் கிழக்காசியாவில்
(ஆசியாவின் தென்பகுதிகளில் என்பது 
கவியில் சொல்லப்பட்டது )
திரக்குவது -  தேடுவது.
பசுநிலம் -  கிரீன்லாந்து,
பறவை ஊர்தி:  வானூர்தி (  விமானம்)
வாழ்க்கை பலவிதம்: உலகில் வாழ்க்கை பலவகை
செலவியலா -  பயணம் போக முடியாத
ஒப்பில் =  இணையில்லாத.
குளிர்வதை -  கடுங்குளிர்
தலைமை விலங்கினமோ:  வேறு விலங்குகள் உள்ளனவோ?
தனிமைத் துயர்:  இவ்விலங்கு ஒண்டியாய் இருப்பதுபோல்
உள்ளது.
விலக்கி வீடு கட்டி -  சேர்த்தபடி கட்டாமல் எட்ட எட்டக் கட்டி
கலக்க -  அங்கொன்று இங்கொன்றாக.
பரந்து உறையும் -  விரிந்த நிலப்பகுதியில் வாழும்.
கடனார் -  கடமை மிக்க;  கடன் -  கடமை.
வளமக்கள் -  செழிப்பாக வாழும் மக்கள்.

மேலுணவு -  முக்கிய உணவு.
மானும் மயிலும் இல்லா :  இவ்விலங்குகள் இங்கு இல்லை.
மாவண் திறம்:  இவை இல்லாவிட்டாலும் அழகுதரும்
இயற்கையைப் புகழ்ந்து பாராட்டுதல்.