மழையின்போது இயற்கைக்காட்சி
வெட்டவெளிப் பறக்கின்ற நீர்த்துளிக ளாலே
வேண்டியதொன் றைப்பார்க்க வீண்முயற்சி ஆச்சே!
ஒட்டியுடன் விழுகின்ற கனத்திவலை கண்டேன்
ஒட்ப திட்பம் எலாம்சமைந்து வெப்பம்தணி மாரி.
இருளுடனே ஒளிகதிர்கள் இறுகிநின்ற வானில்
இரவுபகல் கலந்தமைபோல் கரவுதரும் காட்சி
பிறவிபல உருண்டுசெலப் பெற்றிடினும் ஈண்டிப்
பெருவியப்பின் உருவனைத்தும் பெருக்கியுணர் வேனோ?
அரும்பொருள்:
[ இது உரை போலன்றி விளக்கத்தின் பொருட்டுத் தரப்படுகிறது ]
வேண்டியதொன்று - காணவேண்டி நோக்குகையில் தெரியாமலிருப்பது.
ஒட்பம் - ஒளியுள்ள நிலை.
திட்பம் - திண்மையான வெளிப்பாடுகள்.
பறக்கின்ற நீர்த்துளிகள் - இவை பக்கவாட்டில் வந்து நேர்கொட்டுதலைக் கடந்து பறந்தவை.
கனத்திவலைகள்: இவை கனமுள்ள பெருந்துளிகள் மேலிருந்து கீழாகக்
நேர்படக் கொட்டியவை.
ஒட்டி - மேல்கீழ் கொட்டுதலைச் சந்தித்த பக்கவாட்டுச் சிறிய துளிகள்.
வெப்பம் தணி: இது பரவியிருந்த வெப்பத்தின் அளவைக் குறைத்துவிட்டது.
மாரி - மழை.
இருளும் ஒளியும் கலந்து நின்ற காட்சியை அடுத்த பாடல் விவரிக்கிறது.
இறுகி - மிக்க நெருக்கமுடன்
கரவு - இரவா பகலா என்ற வெளிப்படை இன்மை.
செல - செல்ல ( தொகுத்தல் )
ஈண்டு - இங்கு ; ஈண்டு + இப்
உருத்தல்: தோன்றுதல். உருவனைத்தும் - காட்சியளித்தவை எல்லாவற்றையும்.
பெருக்கி - ஒன்று சேர்த்து
மெய்ப்பு பின்
கருத்துகள் இல்லை:
கருத்துரையிடுக