மகுடமுகி நோய்நுண்மிகள் - ஆடினது போதுமே.

குறுமியாம் கிருமியே இருபதாம் ஆண்டிதனைக்
குறுகியதும் துன்பநாளே.
வறுமையில் வாடிடுவர், வளம்பல கூடிடுவர்
வந்திடும்  யாரெனினுமே.

கொன்றதுபல் ஆயிரமே  பிள்ளைதாய் ஆயினுமே
மண்டுபசி தீராமலே,
உண்டதுவே குடித்ததுவே உயிர்களை என்செய்வோம்
உலகெங்கும் வெடித்ததொற்றே.

தோன்றுமிடம் சென்றினிய தோழியரைத் தோழர்களை
ஊழியர்கள்  ஈண்டுகாணத்
தாண்டிடவும் விட்டதிலை தலையிலடித் தேவீட்டில்
தங்கிடவே பொங்குதுயரே.

ஆடினது போதுமினி மகுடமுகிப் பேய்க்கிருமி
ஓடிடவே செய் இறைவனே
நாடின இன் பங்களெலாம் நாம் காணக் கொஞ்சமினி
நன்மக்கள் பெறவேணுமே.


அரும்பொருள்

குறுகியதும்   :     அடைந்ததும்.   சேர்ந்ததும்.
வளம்பல கூடிடுவர் :   செல்வத்துடன் கூடி இருப்போர்.
மண்டு  -   மிகு.

தோன்றுமிடம் -  நினைத்துச் செல்லுமிடம்
தாண்டிடவும் -  தடுப்புகளைக் கடந்திடவும்.
பொங்கு துயரே -  துயர் மிகுதல்.