வியாதி வியாபாரம் (விர், விய் அடிச்சொல்)

வியாதி எங்கின்ற சொல்லை ஆய்வு செய்வோம்.

விர் > விரி. 

விர் > விய்.

விர் என்ற அடிச்சொல்லிலிருந்து விரி என்ற வினைச்சொல் பிறந்தது. இதை அறிந்துகொள்வதற்கு கடினப்படுதல் தேவையில்லை. எளிதாகவே அறிந்துகொள்ளலாம்.

விர் என்ற  அடிச்சொல்லிலிருந்தே விரல் என்ற சொல்லும் பிறந்தது.  நீட்டவும் சுருக்கவும் ஆற்றல் பெற்ற விரல் என்ற சொல்,  விர் என்பதனின்று தோன்றியிருப்பது, பொருத்தமே.  மற்றும் விரி விரிதல் என்பனவோடு அதற்குள்ள தொடர்பும் தெற்றெனத் தெரிகிறது. பெரும்பாலும் இடுகுறிப் பெயர் என்று இலக்கணியர் எண்ணிய சொல்லுக்கு இப்போது ஒரு வெளிச்சம் உண்டாகிறது.

ஆசை என்பது மனத்தில் தோன்றி ஒரு பொருள்மேலோ ஆள்மேலோ விரிகிறது. இது மனத்துக்கண் தோன்றி விரியும் எண்ணம் ஆகும்.  எனவே விர் என்ற அடியிலிருந்தே அதற்குச் சொல் உண்டாகின்றது.  விர்> (விரு) > விரும்பு என்று சொல் அமைகிறது.  தாமும் தம் பெண்டு பிள்ளைகள் மட்டுமில்லாமல் பிறருக்கும் உணவளிப்பது ஒரு மன விரிவும் செயல்பாட்டு விரிவுமாகும். இதற்கும் விர் என்ற அடியிலிருந்தே சொல் அமைந்தது.  விர்> விரு > விருந்து. இதில் து என்பது விகுதி. பெரும்பாலும் வீட்டிற்குப் புதியவர்களே உண்ண வந்தனர்.  ஆதலின் விருந்து என்பது புதுமை என்னும் கருத்தையும் உள்ளடக்கி விரிந்தது. பிறந்த குழந்தை புதுவரவு ஆதலின் அதற்கு விருந்து என்ற சொல் பயன்பட்டது. “விருந்து வரும் பத்தா மாசத்தில்” என்ற மலையாளப் பாட்டு கேட்டதுண்டோ?  புது என்பதிலிருந்தே “புதல்வர். புதல்வி” என்றெல்லாம் சொற்கள் வந்தன.  “நியூ போர்ன்” என்ற ஆங்கில வழக்கையும் கவனிக்க.

இதனை விரிக்காமல், இடுகையைச் சுருக்குவோம்.

பின் விர் என்பதிலிருந்து விய் என்பது விரிவு குறித்துத் தோன்றிற்று.

விர்> விய்.

இதிலிருந்து தோன்றிய சொல்லே “வியன்” என்னும் சொல். “வியனுலகு” = விரிந்த உலகு. அடுத்து, வியாபாரம். இதில் விய+பாரம் என்று இருசொற்கள் உள்ளன.   பல இடங்களுக்கும் சென்று விற்றலை வியாபாரம் என்பது குறிக்கிறது. பாரம் என்ற சொல்லும் பொருள்களைப் பரக்கக் கொண்டுசெல்லுதலையே குறிக்கிறது. பர> பார்> பாரம்.அதாவது விரித்து வழங்கல்.  .பொருள்கள் பரப்பி வைக்கப்படுதல் பாரம் என்றே சொல்லப்படும். பரக்க வைக்கப்படுவன கனம் உடையனவாய் இருக்கும் ஆதலின், பாரம் என்பது “கனம்” “பளு” என்றும் பொருள்படும்.  வியாதி என்பது பரவும் நோய். பிற்காலத்தில் தொற்றிப் பரவாத நோய்களுக்கும் அது பொருள் விரிந்தது.

விற்றல் என்பதற்கு வில் என்பதே அடியாகக் கூறப்படினும், பேச்சு வழக்கில் "விய்" என்றே சொல்வர்.. விய் > வியா தொடர்பினை அறிக.

இவைபற்றிப் பின்பொரு நாள் விரித்து விளக்குவோம்.

ஏன் அரசியலில் இத்தனை கட்சிகள்?

கட்சி அரசியல்

 கட்சி அரசியல் என்பது, நாடாளுமன்றம் போலும் பேசித் தீர்மானிக்கும் இடத்தில்,  ஆளுங்கட்சி. எதிர்க்கட்சி என்று பிரிந்து நாட்டு நிறுவாகம்

செயல்படும் நிலையைக் குறிக்கிறது.

மன்னர்கள் காலத்தில் இத்தகைய கட்சி அரசியல் தமிழ் நாட்டிலோ துணைக் கண்டத்திலோ நடைபெறவில்லை. இது இங்கிலாந்தில் தோன்றி வளர்ந்து இப்போது பல நாடுகளிலும் பரவியுள்ளது.

அதிலும் மிகுதியான அரசியல் கட்சிகள் இயங்கும் நாடு இந்தியாவே என்று தெரிகிறது.  புள்ளிவிவரம் எடுக்கவில்லை என்றாலும் மற்ற நாடுகளில் சற்றுக் குறைவாக இருப்பதுபோல் தோன்றுகிறது.

எதிர்க்கட்சிகள் பல இருந்து அவற்றுக்கு அரசு பதில்சொல்லிக்கொண்டே இருந்தால்  அரசு ஆட்சியில் கவனம் செலுத்த இயலாமல் போய்விடும் என்ற குறைபாடும் உள்ளது.

ஆனால் மக்களாட்சி அமைப்பில் எதிர்க்கட்சி இருக்கவேண்டும் என்பது ஆட்சிமுறை ஆகும்.  ஆனால் இத்தனைதாம் இருக்கவேண்டும் என்று கணக்கில்லையாகையால் (limit)  ,  பல உண்டாகிவிடுகின்றன. அமெரிக்காவில் உள்ளதுபோல இரண்டே இருக்கவேண்டும் என்பது அறிஞர் கருத்து  ஆகும். ஒரே பொருளின்மேல் பத்து எதிர்க்கட்சிகள் பத்து விதமான கருத்துக்களை வெளியிட்டால் மக்களாட்சி முறைப்படி இந்தப் பத்துக் கருத்துக்களையும் மக்கள் உள்வாங்கி ஆராய்ந்து தமக்கு இவற்றுள் எது பிடித்தமானது என்று முடிவுசெய்யவேண்டும். (அல்லது குழப்பம் அடைவார்கள் ) இதற்கு மக்கள் முழுநேரமாய் அரசியல் ஆய்வில் ஈடுபட்டுக்கொண்டிருக்கவேண்டும். அப்படி மக்கள் ஆய்வு செய்துகொண்டிருந்தாலும், ஒரு தேர்தலுக்கும் இன்னொரு தேர்தலுக்கும் உள்ள இடைவெளிக் காலத்தில், இக்கருத்துக்கள் பற்றி மக்கள் எதுவும் செய்தற்கியலாது. நாங்காண்டுக் கொருமுறையோ ஐந்தாண்டுக் கொருமுறையோ வாக்களிப்பதன்றி, மக்களால் எதுவுமாகாது.

எனவே மக்களுக்குப் பிடித்தமானது எது என்று அறிந்து செயல்பட, ஆட்சியில் உள்ள கட்சியோ அல்லது எதிர்க்கட்சியோதான் (யாராக இருந்தாலும் உள்ளவர்கள்தாம்) இடைக்காலத்தில் முயற்சி மேற்கொள்ளவேண்டியுள்ளது.  மன்னர்காலத்திலும் ஆட்சியில் உள்ள மன்னன் எது மக்களுக்குப் பிடித்தமானது என்று அறிந்துகொள்ள வழிகள் இருந்திருக்கலாம்.  அந்த வழிகள் மக்களாட்சியில் தேர்தலுக்கிடைப்பட்ட காலத்து வழிகளாகவும் மன்னராட்சி முறையில் என்றுமுள்ள முறைகளாகவும்  உள என்பது சிந்திப்பார்க்குப் புலப்படும்.

பதில்நிலையர்கள்  (பிரதிநிதிகள்) முறையிலேதான் தேர்தலுக்குப்பின் ஒரு மக்களாட்சி நாட்டில் ஆட்சி நடைபெறமுடியும். நாடாளுமன்றில் பதில்நிலையர்களே உறுப்பினராக இருந்து கருத்துமொழிதலை நடாத்த இயலும். எல்லா மக்களும் போயிருந்து பேசினால்தான் உண்மையான மக்களாட்சி, என்ற போதிலும், அது நடைமுறைக்கு ஏலாதது. எல்லாப் படிநிலையரும் பங்குபெறாததை மக்களாட்சி என்பது, வேறுவழி இல்லாமல்தான். நாட்டில் இரண்டே கட்சிகள் இருக்கவேண்டுமென்று சட்டமியற்றலாம்.  ஆனால் அது உரிமைப்பறிப்பு என்றும் மக்களாட்சிக்கு முரண் என்றும் தருக்கத்துக்கு உள்ளாகலாம் ஆகையால், இதற்கு ஒன்றும் செய்ய இயலாது என்றே தோன்றுகிறது.

 தலைப்புள்  ஏன் இத்தனை கட்சிகள்?

   .

 

கடி, கறி, கொறி, இவற்றுள் " கடி" : சொல் வண்ணம்.

-கடி.  கறி,  கொறி

கடி என்ற சொல்லை அணுகி அலசுங்கள்.  இதிலுள்ள இரண்டு எழுத்துக்களுமே வல்லெழுத்துக்கள்.  கடலையைக் கடிக்கும்போது, அதை  பற்களில் வைத்து நெருக்கி உடைத்து மென்று மெதுவாக்கி மனிதன் விழுங்குகிறான். அது சற்று கடுமையான வேலை.  அவன் கடிக்குங்காலை உங்கள் விரல் அங்கே போய்விடுமானால் அது துண்டாகிவிடக்கூடும். தமிழ்மொழியில் கடினமானதைச் செய்யும்போது, கடினமான ஒலிகளை உள்வைத்துச் சொல்லை அமைக்கிறார்கள்.  க என்பது வல்லெழுத்து. டி என்பதும் வல்லெழுத்து.  இந்தச் சொல் கடு (கடுமை) என்ற அடிச்சொல்லிலிருந்து அமைக்கப்படுகிறது.  இதைக் கடு> கடி என்று எழுதிக் காட்டலாம். இப்படி மட்டும் கூறினால் இதில் நான் உங்களிடம் சொன்ன மற்ற விடயங்களையும் நீங்கள் புரிந்துகொண்டுவிட்டீர்கள் என்று என்னால் அறுதியிட முடியவில்லை. ஆகவே கொஞ்சம், நேரம் செலவு செய்து சற்று விளக்கமாகச் சொன்னேன்.

கடின வேலைக்கு ஒரு சொல்லை அமைக்கும்போது அதற்கு உரிய வண்ணம் கொடுக்கவேண்டும். ஒரு மென்மையான உணர்வினை வரணிக்கும் ஒரு கவி, மெல்லெழுத்துக்களை உடைய சொற்களைப் போட்டு வரணிக்கவேண்டும். இதனை மெலிபு வண்ணம் என்றார் தொல்காப்பியனார்.

பாலொடு தேன் கலந்தற்றே பணிமொழி

வாலெயி றூறிய நீர்.

என்பது வள்ளுவன் குறள். இதில் லனநீ முதலியன பயின்று வருமாறு பாடப்பெற்றுள்ளது. இவை மெல்லெழுத்துக்கள். லலொலெ வருகின்றன.  இனி ணிமொழிவாயி இடையின எழுத்துக்கள் வருகின்றன.  தாம் எடுத்துக்கொண்ட கருத்தை விளக்கியமை மட்டுமின்றி அதற்கேற்ற வண்ணமும் பயிலும்படி தெய்வப்புலமை நாயனார் அமைத்துள்ளார்.  நயமானவற்றை எடுத்துச் சொல்வோரை நாம் “நாயன்” என்போம். நய + அன் = நாயன்.  முதனிலை நீண்டு அன் விகுதி பெற்ற பெயர்.

சொற்கள் மொழியில் உருவான போதும் கடின வேலையைக் குறிக்கும்போது வல்லெழுத்துக்களைப் போட்டு “வலிபு” வண்ணம் பயிலும்படியாகச் சொல் அமைந்துள்ளது.

இனிக் கறி, கொறி என்பதையும் விளக்கவேண்டும். இப்போது நேரமில்லை. இன்னொரு சந்திப்பின்போது அதை விளக்குவோம்.  அப்போதுதான் தமிழ்மொழியின் இனிமை நன்கு புலப்படும்.

 .

அடுத்து :  நாதன் நாமகள்.