முடியாதவர்களுக்கான மின்வண்டி.

 அகவைபல  கடந்துநடை  தளர்ந்திறங்கி

ஆடியாடிச்  செல்கின்ற  நிலையடைந்து

முகமேதோல்   சுருங்கிவலி   கைகாலூர்ந்து

முடக்கமெனும் கட்டமது நேர்ந்தபோதும்

திகைப்பதுதீர் முதியர்நட மாட்டமேற்றி

தேனில்லா விடினும்நற் சருக்கரைபோல்

வகையாக வரப்போக   உறவுநண்பை

வளர்விக்க  இயங்கியொன்று வந்ததேபார்!  

மின்னடையாற்  றல்தன்னால்  ஒலியெழுப்பி

மீயெனுமோர் இசைமீட்டி ஓட்டம்கூட்டும்

தன்விடுகை  வண்டியிதைத்  தனதாய்க்கொண்டு

தடுக்கிவிழும் முதியோரும்   அங்குமிங்கும்

மின்னலைப்போல் இல்லெனினும் விரைந்துசற்று

மேனிலையில் வேலைகளைத்  தீர்க்குமாற்றல்

பன்னலமும் தாம்பெறுவர் இரவுவேளை

பகல்புலர்ந்த நலம்காண   வந்ததேபார்!

மேயென்றே  ஓடுவதாம்  ஆடுமின்  வண்டிநீயே

மீயென்றே மீட்டுவிரைந்   தோடு.

அரும்பதவுரை:

அகவைபல கடந்து  --- முதுமை அடைந்து

 தளர்ந்திறங்கி -  தளர்ந்து இறங்கி,   இறங்கி - வாழ்க்கை

இறங்குமுக மாகி,

வலி   கைகாலூர்ந்து -- கைகால் வலி மேலிட்டு;

முடக்கமெனும் கட்டமது நேர்ந்தபோதும் -  முடக்கம் ஏற்பட்டாலும்.

திகைப்பது   தீர்   -- திகைப்பை நீக்கிக்கொள்க;

முதியர்நட மாட்டமேற்றி  ---- முதியவர்களுக்கு அவர்களின் நடமாட்டத்தை

அதிகமாக்கி;

தேனில்லா விடினும்நற் சருக்கரைபோல்  ---- தேன் கிடைக்காத போது=

சர்க்கரை கிட்டியது போல;

வகையாக வரப்போக  --  நல்லபடி( உறவினர் நண்பரிடை) ஈடுபாடு மிக; 

உறவுநண்பை வளர்விக்க---  உறவுகளையும் நட்பையும்  பெருக்க,

இயங்கியொன்று வந்ததேபார்!  ----  ஒரு வண்டி வந்துள்ளது.  பார்க்கவும்.

மின்னடையாற்றல்  தன்னால்  -- பாட்டரி வலிமையினால்

ஒலியெழுப்பி --சத்தம் ஏற்படுத்தி;

மீயெனுமோர் இசைமீட்டி -- மீ என்று ஒலியுடன்;

 ஓட்டம்கூட்டும்  --  ஓடுகின்ற,

தன்விடுகை  வண்டியிதை --- முதியவர் தானே ஓட்டிச் செல்லும் இந்த வண்டியை;

தனதாய்க்கொண்டு --  வாங்கி வைத்துக்கொண்டு,

தடுக்கிவிழும் முதியோரும்   அங்குமிங்கும்;

மின்னலைப்போல் இல்லெனினும் -  அதிவேகமாய் இல்லை என்றாலும்;

விரைந்துசற்று  கொஞ்சம் விரைவாக;

மேனிலையில்-  நல்ல விதமாக;

 வேலைகளைத்  தீர்க்குமாற்றல்,  ~;  தீர்க்கும் - முடிக்கும்,  ஆற்றல் - திறம்;

பன்னலமும் தாம்பெறுவர் --  பல நலமும் அடைவர்.

இரவுவேளை  பகல்புலர்ந்த -  வாழ்வின் இரவில் உள்ள முதியவர் கூட

பகலில் வந்துவிடும்,

நலம்காண   வந்ததேபார்!  என்றவாறு.

நண்பு நட்பு இருவகையாக எழுதப்படும். நட்டல் என்பதும் சரி.

அறிந்த சொற்கள் சிலவற்றுக்குப் பொருள் விடப்பட்டுள்ளது.

வண்டிகளின் படம்:

அறிக மகிழ்க.

மெய்ப்பு பின்.

பேரிகை - தாண்டவம், "இகை"

பேரிகை என்ற பண்டைக்கால முரசு/ பறை. 

பேரிகை என்பது ஒருவகைப் பறையின் பெயர். இதை வாசிப்பதைக் கொட்டுதல் முழக்குதல் என்ற வினைகளால் குறிக்கலாம்.

இப் பேரிகை என்னும் சொல்லில்  இறுதி இகை என்று முடிகிறது.  இகை என்ற தொழிற்பெயர்  இகு+ ஐ என்று விகுதி புணர்த்தி அமைந்தது.  இதுபோல் அமைந்த வேறுசொற்கள் :  தொகை ( தொகு  ஐ),  நகை (நகு + ஐ),  தகை ( தகு ஐ ) எனப் பலவுள்ளன.  இகத்தல் பல்பொருட் சொல் என்றாலும், அதன் பொருட்களில், தாண்டுதல் என்பதுமொன்று. இகை என்பது தாண்டுதல் என்று பொருள்கொள்ளுவோமானால்,  இந்தப் பேரிகை என்பதை அங்குமிங்கும் தாண்டிக்கொண்டு ஆடினர் என்று முடிபு கொள்ளலாம்.  தாண்டித் தாண்டி ஆடிய ஆட்டங்களும் உள்ளன.  தாண்டவம் என்று சிவபெருமான் ஆடியதாகக் கூறப்படும் நடனமும் உண்டு.  "பொன்னம்பலம் தனில் தாண்டவமாடிய (சிவம்)" என்பது காண்க.  தாண்டு+ அ+ அம் =  தாண்டவம், இங்கு  அ என்பது சொல்லாக்க இடைநிலை, அம் என்பது விகுதி.  அ+ அம் = அவம், இதில் வ் என்பது வகர உடம்படுமெய். இது அவர் என்பதில் அ+ வ் + அர் > ~  , வகர உடம்படு மெய்  என்றபடி.

இகத்தல் என்பது  தாண்டுதல் என்று நம் நிகண்டுகள் சரியாகவே பொருள்கூறியுள்ளன.  இது ஒரு சுட்டடிச் சொல்.  இது எவ்வாறு ஆனது என்பதை இப்போது கண்டுகொள்வோம்.

இக : வினைச்சொல்.  இ + கு + அ.    இ என்பது இங்கு,   அ என்பது அங்கு.  தாண்டுவது, இங்கிருந்து அங்கு,  அங்கிருந்து இங்கு.   கு என்பது சேர்விடம் குறிக்கும் சிறுசொல், இக்காலத்தில் அது உருபாகவும் பயன் காண்கின்றது.

பேரிகை என்ற சொல்லை இப்போது நன் கு அறிந்தோம்.  ஆனால் இச்சொல்லை வேறொரு முறையிலும் அறியலாம்.  அதைப் பின் ஓர் இடுகையில் சொல்வோம்.

அறிக மகிழ்க.

மெய்ப்பு பின்.

"காண்வாய்" தமிழில் எப்படிச் சொல்வது.

 காண்வாய் என்பது இரண்டு தமிழ்ச்சொற்களை இணைத்த தொடர்போல் உள்ளது.

வாயைப் பார் என்று பொருள்கொள்ளலாம்.  ஆனால் இலக்கியத் தமிழில் வாய் என்பதற்கு இடம் என்ற பொருளும் உள்ளது. வாய்க்குருவி என்றால் ஊதுகுழல். இதுபோல் சொற்களும் உள்ளன.  வாய்க்காலுக்குப் போதல் என்றால் கால்லால் போதல்,  கழிப்பிடம் செல்லுதல் என்பது,  இவ்வாறு வேறுபொருள் தரும் சொற்களும் தொடர்களும் உள்ளன.

இங்கு நாம் எடுத்துக்கொண்ட " காண்வாய்"  என்பது  "ஊர்தியுலா"  ,  காப்புலா,  ஊர்தியணி,   ஊர்தித்தொடர்,  வாகனத்தொடர்,  வாகனப்பாதுகாப்பணி  என்று சிலவகைகளில்  தமிழில் சொல்லலாம்.  காண்வாய் - convoy. ஆங்கிலச் சொல்.

செய்திக்கு ஏற்ற பொருளுடைய சொல்லைத் தேர்ந்தெடுத்துத் தமிழில் சொல்ல முயற்சி மேற்கொள்ளுங்கள். எளிதன்று ஆனாலும் முயற்சி திருவினை. 

உங்கள் வாசிப்புக்கு:

https://sivamaalaa.blogspot.com/2017/08/blog-post_28.html

உங்கள் கருத்துகளைப் பின்னூட்டமிடுங்கள்.

அறிக மகிழ்க.

மெய்ப்பு பின்