பரம்பரை

பரம்பரை என்னும் சொல்லைக் கவனிப்போம்.

பர ‍‍ > பரத்தல்
பர>  பரவுதல்.
பர   பரம்  (பர+அம்).
பர >பரம் > பரமன். (எங்கும் பரவி நிற்பவன், கடவுள்.)
பர  > பரம்பொருள்.
பர >  பரை.  (பர+ஐ).
பர  > பரம் > பரம்பரை.  

ஒவ்வொரு தலைமுறையிலும் பிறப்பினால் தொடர்வது,  தொடர்ந்து பரவுவது.

இந்தச் சொல் பர என்னும் தமிழ் மூலச் சொல்லினின்று பிறந்தது. தமிழ்ச் சொல். வேறு இந்திய மொழிகளிலும் பரவியுள்ளதாகும்.  மகாபாரதத்திலும் பயன்பட்டுள்ளதாகும்.  இது இந்தோ ஐரோப்பியத்தில் உள்ளதாகத் தெரியவில்லை.

மசாலை

மசாலை என்ற  தமிழ்ச்சொல் வேறு மொழிகளிலும்  இப்போது பரவி "சேவை " செய்துவருகிறது. மசாலா தோசை மூலம் மசாலா என்ற சொல் சீனர்கள் மலாய்க் காரர்களுக்கும் தெரிகிறது.  கிழங்குப் "பெரட்டல் "  (புரட்டல்)) தோசையின் உள்ளீடாக வைக்கப்படுவதால்  அதுதான் அவர்கள் அறிந்த மசாலா .  மசாலைத் தூள் தயாரிப்பாளர்கள் மூலம் இச்சொல் வானொலி மற்றும் தொலைக்காட்சியில் அன்றாட வழக்குச் சொல்லாகிவிட்டது.

மசித்தல் , இது அம்மியில் வைத்து அரைத்து மசிக்கப்  படுவதை குறிக்கிறது.
இப்போது அரைபொறிகள் இவ்வேலைச் செய்கின்றன.

மசி  + ஆல் +  ஐ =  மசாலை. மசித்தலால் குழைவாக்கப்படுவது என்று பொருள்.  ஆல் = கருவிப் பொருளில்  அழகாக  வந்துள்ளது.  ஐ - .விகுதி .

மசாலா என்பது அதன் திரிபு .

தசை

இனித் தசை என்னும் சொல்லை ஆய்வு செய்வோம்.   இது எழுத்துக்கள் முறை மாறி,   சதை  என்றும் அமையும்.  இவற்றில், தசை என்பதே முந்துசொல் என்பதால், அதையே ஆய்வுசெயல் தக்கது. சதை எனற்பாலது அதனின்று திரிந்து அமைந்த எழுத்து  முறைபிறழ்  சொல்.

தசையானது, என்புடனும் நரம்புடனும் தைக்கப்பட்டுள்ளது. தைத்தல் என்பதோ வெனின் இணைத்தற் பொருளதாம்.

முன் தயிர் என்பதனுள் நுழைந்து கண்டோம். தை > தய் > தயிர் என்பது காணப்பட்டது.

அதுவேபோல் தை > தய் > தசு  >  தசை.  இனி, தை > தய் >   தயை > தசை என்றும் ஆகும். இரண்டும்  ஒரே தெருவழித்தான் செல்கின்றன.       இரக்கத்துக்குரியோன்பால் மனம் சென்று தைத்தலும் அல்லது தையுறுதலும்  தை >  தய் > தயை தான். ஆனால்  இந்தத்  தயை உணர்வு,   தசை என்று மாறாது.   நிற்க, சதை குறித்த சொல் "தசை" என்று திரிந்தது,.  தொடர்புடைய எல்லாம் திரியுமாயின் பொருள் குழப்பம் ஏற்படும். மொழிக்கடல் சில அலைகளைச்  சில வரம்புக்குள் நிறுத்திவிடுகிறது. நடுக்கடல் அலைகள் எல்லாம் கரைக்கா வந்துவிடுகின்றன?

இங்ஙனம் தை என்ற அடியிற் பிறந்ததே தசை.

முன்னே கூறப்பட்ட சில திரிபு விதிகளை இங்கு  மீண்டும் கொண்டு  முன் நிறுத்தவில்லை. சுருங்கச் சொல்லல் கருத்தாம்.  For further   information and clarity, please refer to the older posts.

http://sivamaalaa.blogspot.com/2014/05/blog-post_28.html

http://sivamaalaa.blogspot.com/2014/05/blog-post_3822.html

http://sivamaalaa.blogspot.com/2014/05/blog-post_27.html