"ப்ரகடனம்" என்ற சொல்லினை அறிவோம். இதற்கு வேறு விளக்கங்களும் இருக்கலாம் என்றாலும் நாம் வெறுமனே அந்த மொழி, இந்த மொழி என்று தடுமாறாமல் மூலச்சொற்களை ஆராய்ந்தறிவோம். அதுவே சொல்லமைந்த கருமூலத்தைச் சுட்டவல்லது ஆகையினால்.
ஒன்றை நாம் வெளியிடுவதானால் அது அக்கருத்துத் தோன்றிய இடத்தினின்று புறப்பட்டுச் சில எல்லைகளைக் கடந்து அப்பால் செல்லுகிறது என்று அறிதல் உண்மைகாண்டற்கு வழிசெய்யுமென் றறிக. எல்லை, வகுக்கப்படாத எல்லையும் ஆகலாம். (காண்டல் = காணுதல்)
எனவே நாம் முதலில் "கட " என்ற சொல்லின்பால் கவனத்தைச் செலுத்தவேண்டும். இது கட+ அன் + அம் > கடனம் ஆகிறது. ஒரு சொல்லாக்கத்தில் வரும் இடைநிலையானது வெறும் சொல்லமைவுக்கு வழிசெய்யும் இடைச்சொல் ஆகலாம், அல்லது அதற்கு ஒரு பொருளும் இருக்கலாம். இருந்தால் அதுவும் நன்றே எனலாம்.
அன் என்ற பகுதிச்சொல் அனைத்து என்ற சொல்லில் இருப்பதனால், இடைநின்ற - யாவருமறிந்திடக் கடந்து சென்ற ஒரு செய்தி என்றபடி வைத்துக்கொள்ளலாம். அம் என்ற இறுதிநிலை, அமைவு குறிக்கும் விகுதி ஆகும்.
பிரகடனம் என்ற சொல்லில் ."கடனம்: என்ற சொல்பகுதி தெளிவாகவே பொருண்மையுடன் மிளிர்கின்றது. ஒருவன் கடன்வாங்கினால் அதைத் திருப்பிக் கொடுத்தே ஆகவேண்டியது அவனின் கடமை என்ற பொருளில் "கடன்" என்ற சொல் வழங்கிவருவது நாம் அறிந்தது. அந்தக் "கடன்" எனற்பால சொல்லுடன் இந்தக் கடனம் என்ற சொற்பகுதியும் தொடர்புடையதாய் நிற்றல் நம் தேடுகையை எளிதாக்குகிறது என்பதும் குறிப்பிடத் தக்கதாம்.
இனிப் ப்ர, பிர என்ற முன்னியைந்த சொல்லுக்கு வருவோம். இது பிற, புற என்ற இரண்டுக்கும் பொருந்தி வருகிறது. வீட்டின் அல்லது செய்தி தோன்றிய இடனுக்கும் புறத்தே செல்வது, பிறரிடம் செல்வது அதாவது பிறரறியச் சொல்லப்படுவது என்று இருவகையிலும் இது பொருந்துவதாகிறது. ப்ர என்பது ஒரு முன்னொட்டு என்று முன்னர் முடிபு பெற்றிருப்பினும், அத்தகு முடிபினால் நம் ஆய்வுச்செலவு பாதிக்கப்படாது நின்றமை காண்க.
இவ்வாய்விடுகையை முடித்து நிறுத்தும் உத்தி கருதி, யாம் இங்கு "புற" என்பதைத் தேர்வு செய்வாம். ஆயினும் பிற எனற்பாலதும் பொருந்துவதே. இதை வாசிப்போர் இவற்றுள் எதையும் முற்பகுதியாய்க் கொள்க. அதனால் பங்கமொன்றும் இல்லையாதல் உணரற் பாலது.
புற பிற என்பன நீங்கப் பிர என்று வந்தது வழக்கில் மெலித்தல் என்பதே உண்மை. இடையினப் படுத்தி ஒலி மெலித்தலாம்.
எந்தச் செய்தியும் அல்லது நிகழ்வும் பிறரையும் கடந்து புறத்தே செல்லவேண்டும். அப்போதுதான் அது பரவும், இச்சொல்லமைவு அதனைத் தெளிவுபடுத்துகிறது. பிற புறம் என்ற இரண்டும் ஈண்டு குலவுகின்றன.
அறிக மகிழ்க.
மெய்ப்பு பின்னர்.
Cursor jumps to unknown spots whilst editing.
Will review.
Any error pl inform us. Thank you.
மெய்ப்பு: 20032021
கருத்துகள் இல்லை:
கருத்துரையிடுக
Please feel free , stating your name or reference, to make any comment relevant to the contents, useful to readers, enhancing the knowledge on the subject-matter . We encourage discussion. Thank you.